ՀՀ նախագահը Վերահսկիչ պալատի նախագահի պաշտոնում առաջադրել է Լեւոն Յոլյանի թեկնածությունը: Նա ԱԺ-ում ներկայացրեց իր ծրագիրը:
ՀԱԿ խմբակցության քարտուղար Արամ Մանուկյանն ասաց, որ հասարակությունը 2 տարբերակ է քննարկում՝ Իշխան Զաքարյանին գործուղել են, կամ նա դեմարշ է արել իշխանություններին եւ մտել է քաղաքական պայքարի մեջ. «Ըստ ձեզ, ի՞նչ է տեղի ունենում ձեր համակարգում՝ ինքը թողեց, ձեռքը թափ տվեց ու գնա՞ց, թե՞ կարող է հետո ձեր շախմատային տերմինով ասեմ՝ ռակիրովկա՝ փոխատեղում լինի»:
Լեւոն Յոլյանը պատասխանեց. «Շախմատային լեզվով ասած՝ Իշխան Զաքարյանի հետ կապված հարցերը խնդրում եմ ուղղել իրեն»:
Կարդացեք նաև
ԲՀԿ խմբակցության պատգամավոր Գուրգեն Արսենյանն ասաց, որ Վերահսկիչ պալատի նախագահը ԱԺ-ինը չի, ժողովրդինն է: Նա ասաց, որ այս տարիներին միշտ ԱԺ-ում լսել են ՎՊ ծրագիրը եւ այն եղել է միշտ դյուցազներգության, առասպելաբանության շրջանակներում: Գուրգեն Արսենյանը հիշեցրեց կաբելի պատմությունը, որի շուրջ մեծ աղմուկ էր բարձրացել. «Արդյունքում որեւէ բան մենք չենք տեսել, ասենք, առարկայացված լինեին հնչած մեղադրանքները»: Նա հարցրեց՝ արդյո՞ք պատրաստվում եք փոխել այդ մոտեցումը, թե՞ ամեն տարի շարունակվելու են լսվել ելույթներ առասպելի մասին:
Յոլյանը պատասխանեց , որ երիտասարդ, լուրջ գիտելիքներ ունեցող երիտասարդների է ինքը ներգրավելու: Նա ասաց, որ իրենց նյութը պետք է լինի հստակ, երկակի մեկնաբանությունների տեղիք չտա, իսկ գնահատականները պետք է տա ԱԺ-ն:
Հռիփսիմե ՋԵԲԵՋՅԱՆ
