Փետրվարի 27-ին «Տեսակետ» մամուլի ակումբի հյուրն էր Սումգայիթում զոհվածների հարազատների վստահված անձ, «Сумгаит… Геноцид… Гласность?» գրքի համահեղինակ, հրապարակախոս, արցախյան շարժման ակտիվիստ, առաջին շաբաթվա միտինգների կազմակերպիչներից Հրայր Ուլուբաբյանը, որը լրագրողների հետ խոսեց «Սումգայիթի ջարդեր. Ցեղասպանության շարունակություն: Հարցի բարձրացումը՝ որպես Արցախի հիմնախնդրի լուծման բանալի» թեմայով:
Հրայր Ուլուբաբյանն ասաց, որ Սումգայիթի ջարդերը ցեղասպանության շղթայի մեջ ուղղակի մի օղակ են ու որ դրա մասին խոսելը Լեռնային Ղարաբաղի հակամարտության կարգավորման գործընթացում կարող է հիմնախնդրի լուծման բանալի դառնալ:
«Սումգայիթի մասին չի խոսվում, հարցը չեն բարձրացնում ու միջազգային մակարդակի հասցնում, մինչդեռ ես ունեմ բավական ապացույցներ դրա իրական լինելն ապացուցելու համար: Այսքան տարիներ են անցել, բայց ոչ մի փոփոխություն չկա այս խնդրի լուծման հարցում», -ասաց Հրայր Ուլուբաբյանը:
Մելանի ՍԱՐԳՍՅԱՆ
