«Ծառուկյան« դաշինքի թեկնածու, ԱԺ պատգամավոր Միքայել Մելքումյանի բնորոշմամբ՝ որոշ ընտրատարածքներում միեւնույն կուսակցությունից վարկանիշային ընտրակարգով առաջադրված թեկնածուների միջեւ «գլադիատորական գզվռտոց» կա: «Մեկը մտնում է մյուսի տարածք, մյուսը մեկի տարածքում շտաբ է բացում…Սա ցածր մակարդակի նախընտրական պայքարի նշան է: Ցավոք, եթե այսպես շարունակվի, լավ բանի չենք հասնի»,-«Սպուտնիկ Արմենիա» մամուլի կենտրոնում այսօր լրագրողների հետ հանդիպմանն ասաց նա:
Մելքումյանը հարցադրում արեց. «Ապագա խորհրդարանը պետք է բաղկացած լինի միայն ակադեմիկոսների՞ց, թե հասարակության բոլոր շերտերը պետք է ներկայացված լինեն: Դա ժողովուրդն է որոշելու»:
Պատգամավորի խոսքով՝ եթե լիներ 6-7 ընտրատարածք՝ 13-ի փոխարեն, ընտրապայքարի քաղաքական բաղադրիչը մեծ կլիներ, իսկ 13 ընտրատարածքի դեպքում որոշ թեկնածուների կողմից գործում է վարչական եւ ֆինանսական ռեսուրսի օգտագործման բաղադրիչը:
Լուիզա ՍՈՒՔԻԱՍՅԱՆ
