«Սպուտնիկ Արմենիա» մամուլի կենտրոնում այսօր ԲՀԿ-ական պատգամավոր, «Ծառուկյան» դաշինքի թեկնածու Միքայել Մելքումյանը հստակեցրեց՝ խորհրդարանական ընտրություններից հետո կոալիցիա կազմելո՞ւ են: «Եթե քաղաքական որոշումների վրա չենք ունենալու այն ազդեցությունը, որը կբավարարի մեր ծրագրերի մեծամասնությունն իրականացնելու համար, իհարկե՝ չենք գնա կոալիցիայի: Գուցե հավասար վիճակում ենք հայտնվելու: Տեսե՞լ եք մի նախարար, որ նշանակման պահին գնա նախագահի մոտ ու ասի՝ «եթե թույլ չեք տալու այս կամ այն քայլերն իրականացնեմ, մի նշանակեք»: Չկա նման դեպք»,-ասաց Մելքումյանը:
Նրա համոզմամբ՝ այդպես պետք է լինի նաեւ կուսակցությունների՝ կոալիցիաներում ընդգրկվելու դեպքում. «Կուսակցություններն իրենց ծրագրերն իրականացնելու իրական պայմաններ պետք է ունենան: Այլապես վերածվում ես շարքային բարձրաստիճան պաշտոնյայի, ինչի՞ համար՝ չգիտես…»:
Պատգամավորն անդրադարձավ նաեւ հարցին, թե ով է լինելու դաշինքի վարչապետի թեկնածուն. «Այս պահին չենք ասի, երբ քարոզարշավը սկսվի, այդ մասին կիմանաք»:
Հարցին՝ «հետընտրական զարգացումներում դուրս կգա՞ք փողոց», Միքայել Մելքումյանը պատասխանեց, որ «Ծառուկյան» դաշինքն ընտրությունների միջոցով է ձգտելու իշխանափոխության:
Կարդացեք նաև
Մելքումյանը մեկնաբանեց կարծիքները, թե «Ծառուկյան» դաշինքը կեղծ ընդդիմություն է, եւ իշխանությունն է Գագիկ Ծառուկյանին խնդրել վերադառնալ. «Իշխանությունն իրեն երբեք շռայլություն չէր տա խնդրելու գալ մի ուժի, որը լուրջ խնդիրներ կառաջացներ, որը հավակնում է հաղթանակի»:
Լուիզա ՍՈՒՔԻԱՍՅԱՆ
