«Ազատություն, արժանապատվություն» ցուցապաստառներով Ազատության հրապարակում մի խումբ երիտասարդներ երեկվանից ի պաշտպանություն արդեն ավելի քան երկու շաբաթ հացադուլի մեջ գտնվող «Հաց բերողի» նստացույց են սկսել: Չնայած երեկ, երբ «Ցեղակրոն» կուսակցության, անազատության մեջ գտնվող Շանթ Հարությունյանի տղան՝ Շահեն Հարությունյանը, նստացույց սկսելու հայտարարություն արեց, ավելի տարեց ցուցարարները նրան ընդդիմացան, բայց ինքն ու իր մի քանի ընկերներ մնացին անդրդվելի:
Շահեն Հարությունյանից հետաքրքրվեցինք՝ համամի՞տ չէր իրեն ուղղված հորդորներին, թե նստացույցով չեն օգնի Արթուր Սարգսյանին, ի պատասխան ասաց. «Համամիտ չեմ, ես ոչ մեկի կոչ չեմ արել նստացույցի գիշերը մնալ, բայց այս գիշեր տասը հոգով մնացել ենք»:
Մեր հարցին՝ նստացույցով ինչ եք պատրաստվում փոխել, Շահեն Հարությունյանը պատասխանեց. «Համենայնդեպս, փորձում եմ, քայլ եմ անում փոխելու, իրավիճակ թելադրելու: Ոչինչ չանելով՝ արդյունքի չես հասնի»:
Կարդացեք նաև
Մեր դիտարկմանը, թե ի տարբերություն Արթուր Սարգսյանի աջակիցների, իշխանություններն ու նույնիսկ մարդու իրավունքների պաշտպանը Արթուր Սարգսյանին քաղբանտարկյալ չեն համարում՝ պնդելով, որ դրա համար իրավական հիմքեր չունեն, Շահեն Հարությունյանը հակադարձեց. «Մենք էլ ասում ենք, որ իրենք այդքան չկան, որ մենք նրանց իրավական հիմքերին ուշադրություն դարձնենք, հանցագործներ են, իրավաբանությունից են խոսում»:
Շահեն Հարությունյանն ասաց՝ նստացույցի ժամկետների մասով որոշում չկա, անորոշ ժամկետով նստացույց են սկսել:
Արփինե ՍԻՄՈՆՅԱՆ
