ՀԱԿ խմբակցության քարտուղար Արամ Մանուկյանը այսօր ԱԺ-կառավարություն հարցուպատասխանի ժամանակ վարչապետին հարցրեց գազի սակագնից: Նա հիշեցրեց, որ վարչապետը նոյեմբերին հայտարարել էր, որ հունվարի 1-ից գազի սակագինը նվազելու է՝ սպառման ծավալներով եւ սահմանին գազի գնի իջեցմամբ պայմանավորված: Արամ Մանուկյանը տվյալներ ներկայացրեց, ըստ որոնց, գազի սպառումը նվազել է 2016-ին՝ 2015-ի համեմատ: Գազի մուտքը ՌԴ-ից ՀՀ պակասել է:
Արամ Մանուկյանը հարցրեց՝ հունվարի 1-ից ասում էիք, որ տրանզիտի գումարը փորձելու եք նվազեցնել, նվազե՞լ է. «Գումարային առումով Վրաստանի տրանզիտը՝ կեսը՝ գազ, կեսը՝ գումարով, նվազե՞լ է 10 տոկոսը, թե՞ չէ: «Գազպրոմի» վիճակը լավ չի, մեր 14 մլրդ-ը, որը առաջացավ 7 դրամով սակագինը նվազեցնելուց, ինչպե՞ս է ՌԴ-ն վերցնելու իր վրա»:
Կարեն Կարապետյանը պատասխանեց, որ 4 գործոն է նշել. «Առաջինը՝ տրանզիտի հնարավոր զիջումը, երկրորդը՝ վարկի սպասարկման տոկոսների նվազեցումը 2017-ին, երրորդը՝ սեփական ծախսերի նվազեցումը եւ շուկայի արձագանքը՝ ցածր գնին: Օրինակ, ակնկալում ենք, որ ջերմոցները շատ կվերցնեն: Այդ էքսպերիմենտի համար «Գազպրոմը» պատրաստ էր սուբսիդավորել այն տարբերությունը, որը տարվա ընթացքում կմնար: Վրաստանի պայմանագիրը կնքվել է հետեւյալ կերպ՝ առաջին մեկ միլիարդը վերցնում ենք 10 տոկոս գազով, հաջորդ քանակը վերցնում են դոլարով, որը 10 տոկոսից ցածր է»:
Արամ Մանուկյանի խոսքերով՝ ամենակարեւոր գործոնը, որ հաշվի չեք առել, այն է, որ ոչ թե սպառման քանակն է պակասում, այլ՝ սպառողի քանակը: Ամեն տարի դա միջինը կազմում է 3-5 տոկոս: Արտագաղթը, փոքր ձեռնարկատերերի, սպառողների քանակի պակասը կա. «Քանի որ «Գազպրոմն» իսկապես ծանր վիճակի մեջ է եւ վստահ եմ՝ այս 14 միլիարդի տեղը ինչ-որ բան ուզելու են, ձրի պանիրը ասում են, թակարդում է լինում, մենք պատրա՞ստ ենք դիմակայել դրան, մեր դառը, տխուր փորձը, երբ պարտքի տեղը միշտ ապրանք ենք տվել, հզորություն ենք տվել, այդ նույն բանը չի կանգնելու մեր դռանը»:
Կարդացեք նաև
Վարչապետը պատասխանեց. «Վստահ եմ, որ այդ նույն բանը, որը դուք եք ձեւակերպում, մեր դռան առջեւ չի կանգնելու»:
Հռիփսիմե ՋԵԲԵՋՅԱՆ
