«9 տարի առաջ ՀՀ իշխանությունները սպանեցին ՀՀ քաղաքացիների: Առնվազն տասը քաղաքացիներ զոհ են գնացել ազատության եւ ժողովրդավարության համար պայքարում»,-Ազատության հրապարակում «Կոնգրես-ՀԺԿ» դաշինքի կազմակերպած հանրահավաքի ժամանակ ասաց ՀԱԿ խմբակցության քարտուղար Արամ Մանուկյանը:
Նա հնչեցրեց մարտի 1-ի զոհերի անունները՝ Գոռ Քլոյան, Դավիթ Պետրոսյան, Տիգրան Աբգարյան, Տիգրան Խաչատրյան, Արմեն Ֆարմանյան, Հովհաննես Հովհաննիսյան, Համլետ Թադեւոսյան, Գրիգոր Գեւորգյան, Սամվել Հարությունյան, Զաքար Հովհաննիսյան, ապա ներկաները մեկ րոպե լռությամբ հարգեցին նրանց հիշատակը:
«Այստեղ հավաքվելու ենք այնքան, քանի դեռ չի բացահայտվել ոճրագործությունը, քանի դեռ իշխանությունները ոչինչ չեն անում՝ այն բացահայտելու համար: Այս տարիներին հետեւողական պայքարել ենք հանցագործությունը բացահայտելու եւ հեղինակներին պատժելու համար: Դա եղել է ոչ միայն մեր կուսակցության, այլեւ հայ ժողովրդի պատվի եւ արժանապատվության խնդիրը: Եթե «Մարտի 1»-ը չբացահայտվի, «Մարտի 1»-ի կրկնությունները միշտ լինելու են»,-նշեց Արամ Մանուկյանը:
Կարդացեք նաև
Նա ընդգծեց, որ ՀԱԿ-ն ու ՀԺԿ-ն շարունակելու են պայքարը՝ մինչեւ «Մարտի 1»-ի բացահայտում. «Մի քանի անգամ խորհրդարանում առաջարկել ենք ստեղծել «Մարտի 1»-ի ուսումնասիրման հանձնաժողով, սակայն իշխանությունները ոչնչացրել են այն»:
Լուիզա ՍՈՒՔԻԱՍՅԱՆ
