«ԵԼՔ»-ն այն եզակի դաշինքն է, որը հասավ նախընտրական շրջան՝ առանց կորստի, բամբասանքի եւ ներքին խժդժոցի: Մեր գործակցությունը թիմային մակարդակով ավելի սերտ է դարձել»,-«ԵԼՔ» դաշինքի նորաբաց միասնական շտաբում այսօր լրագրողների հետ հանդիպմանն ասաց դաշինքին միացած «Հանրապետություն» կուսակցության նախագահ Արամ Սարգսյանը:
Նա նշեց, որ բավականին լավ տրամադրվածությամբ են նախապատրաստվում մարտի 5-ին՝ քարոզարշավի մեկնարկին. «Որոշ դեպքերում մեզ զանգում-ասում են, որ պատրաստ են գրասենյակ նվիրել: Իմ մեքենայի ապակուն էլ «ԵԼՔ»-ի լոգոտիպն է փակցված, շատ լավ են վերաբերվում ոստիկանները, ժպտում են ու հաջողություն են մաղթում»:
«Քաղաքացիական պայմանագիր» կուսակցության վարչության անդամ, ԱԺ պատգամավոր Նիկոլ Փաշինյանի խոսքով՝ պետք է պայմաններ ստեղծեն, որ քաղաքացին գիտակցի՝ իշխանափոխությունը կախված է իր քվեից. «Տեղեկություններ ունենք, որ հայտնի ՀՀԿ-ական թեկնածուներն ասում են՝ սա կուսակցության ընտրություն չի, Դուք ինձ եք ընտրում…Մինչդեռ մարդկանց պետք է ուղերձ հասցնենք, որ խորհրդարանում ուժերի բաշխվածությունը կախված է իրենց քվեներից»:
Կարդացեք նաև
Փաշինյանն անդրադառնալով դաշինքի նախընտրական ծրագրին՝ ասաց, որ առաջարկելու են հայրենադարձություն՝ արտագաղթի փոխարեն. «Սփյուռքի ներկայացուցիչներից կազմված երկրորդ խորհրդարանական պալատ պետք է ձեւավորել, իսկ «Հայաստան» համահայկական հիմնադրամի տնօրենին պետք է նշանակի այդ պալատը»:
Հիշեցնենք, որ «ԵԼՔ»-ի նախընտրական ծրագիրն ամբողջությամբ ներկայացվելու է մարտի 5-ին:
«ԵԼՔ»-ի ներկայացուցիչները չմանրամասնեցին, թե նոր խորհրդարանում ո՞վ է լինելու դաշինքի վարչապետի թեկնածուն: Համենայն դեպս, իրենց խոսքով, նրանք երեքն են՝ Արամ Սարգսյան, Նիկոլ Փաշինյան, Էդմոն Մարուքյան: Իսկ թե հստակ ո՞վ՝ «ժամանակը գա՝ պարզ կլինի»:
Լուիզա ՍՈՒՔԻԱՍՅԱՆ
