«Տարիներով աճեցված Ադրբեջանի տեղեկատվական այդ փակ համակարգը, որտեղ շատ խիստ գրաքննություն է, որտեղ խմբագրին հայկական տեսանյութը տարածելու համար կանչում են դատախազություն, որտեղ մարդուն կարող են բանտարկել իշխանության հասցեին հնչեցրած քննադատության համար, չաշխատեց»,- մարտի 7-ին «Պոստ սկրիպտում» մամուլի ակումբում լրագրողների հետ հանդիպման ընթացքում ասաց Ռազմինֆո կայքի համակարգող Կարեն Վրթանեսյանը:
Նա նշեց, որ Ադրբեջանի իշխանությունները ազատ համակարգում սովոր չեն աշխատել. «Նույն իրենց ապատեղեկատվությունը չի աշխատում, որովհետեւ արդեն չեն հավատում, ծիծաղում են: Շատ հետաքրքիր էր նաեւ այն, որ մենք այդ օրերին սկսեցինք նաեւ ադրբեջաներեն լրատվություն տալ հենց ադրբեջանցի ընթերցողների համար եւ «Ռազմինֆո»-ի էջում հազարից ավել ադրբեջանցի միացավ եւ սկսեց հետեւել մեր գրածներին: Ճիշտ է, ամբողջ թափով ուզում էին այնպես անել, որ մենք էջը Ադրբեջանի համար փակենք՝ հայհոյանքներ էին գրում, ինչ-որ դիակների նկարներ էին լցնում, բողոքներ էին ուղարկում «Ֆեյսբուք», որ մեր էջը փակեն:
Արդյունքն այն էր, որ ոչ միայն չկարողացան փակել, այլ նաեւ մենք հատուկ ադրբեջանական ընթերցողների համար առանձին էջ բացեցինք՝ ադրբեջաներեն: Եվ ինչքան էլ իրենք հորդորում են իրենց օգտատերերին մեր էջը չմտնել, մեր էջը չընթերցել, չմեկնաբանել, այնքան շատ են ադրբեջանցիները նամակներ գրում մեզ, որ ուղղակի չենք հասցնում պատասխանել: Ընդ որում, դրանց զգալի մի մասը հայհոյանքներ են, ավելի լուրջ էլ կան՝ մարդիկ հետաքրքրվում են, մարդիկ ասում են՝ փաստացի հայերը ավելի շուտ տարածեցին սպանվածների ինքնությունների մասին տեղեկություն, քան ադրբեջանական պաշտոնական աղբյուրները»:
Կարեն Վրթանեսյանը չի բացառում, որ ինչ-որ պահի Ադրբեջանի իշխանությունները «Ֆեյսբուք» սոցիալական ցանցը փակեն. «Բաց քննարկման, բաց բանավեճի դաշտում իրենք չեն կարողանում որեւէ բան անել»:
Կարդացեք նաև
Ամի ՉԻՉԱԿՅԱՆ
