«Ես ի՞նչ եմ արել, որ ինձ ափսոսում են: Ես հանգիստ կառավարության ձեւավորման ընթացքում դուրս եմ եկել, հրաժարվել եմ բոլոր առաջարկվող բարձր պաշտոններից: Դրանից հետո ես երկրից դուրս չեմ եկել, որեւիցե մի հանցագործություն չեմ արել, վարել եմ պատշաճ բարեկիրթ կյանք: Հիմա քաղաքական դաշտում գտնվում եմ իմ ժողովրդի կողքին»,- այսօր լրագրողների հետ զրույցում ՕՐՕ դաշինքը գլխավորող ՊՆ նախկին նախարար, Արցախի հերոս Սեյրան Օհանյանն այսպես արձագանքեց դիտարկմանը, որ Արմեն Աշոտյանից հետո հիմա էլ Կարեն Ավագյանն է ափսոսանք հայտնել իր համար, ասել է՝ ափսոս էր գեներալը:
Սեյրան Օհանյանի խոսքերով՝ «Եթե ժողովրդի կողքին լինելը ափսոսանք է, եթե պաշտոններից հրաժարվելը հաշվում են ափսոսանք, եթե այն ուժի կազմում չլինելը, որը այսօր…ինքներդ եք տեսնում, թող ժողովուրդն ասի՝ կա՞ արդյունք, թե՞ չկա արդյունք: Ես չեմ հասկանում, իմ համար յուրաքանչյուր անձնավորության դերակատարությունը երկրի համար անչափ կարեւոր է»:
Նա ասաց, որ պետք է ափսոսալ այն մարդկանց համար, որոնք երկրի համար դերակատարություն չունեն, երկրին նվիրված չեն. «Եկեք չսեւեռվենք եւ վերջ տանք այս ամենին: Ես մեծ հարգանք եմ տածում իմ նախկին գործընկերների հանդեպ եւ պետք չէ սա վերցնել եւ շահարկման առարկա դարձնել այս կարեւոր նախընտրական ժամանակահատվածում, երբ մենք իշխանություն ենք ձեւավորում»:
Հռիփսիմե ՋԵԲԵՋՅԱՆ
