ԱՆ «Հրազդան» քրեակատարողական հիմնարկի դատապարտյալ Վանիկ Անուշավանի Դանիելյանը մի քանի անգամ դիմել է քրեակատարողական հիմնարկների վարչությանը, որպեսզի իրեն տեղափոխեն «Դատապարտյալների հիվանդանոց» ՔԿ հիմնարկ. «Միակ վայրը, որտեղ ինձ հոգեպես լավ եմ զգում, հիվանդանոցն է: Ես նույնիսկ գտնվելով ԴՀ-ում՝ մարմնիս մեջ ասեղներ եմ մտցրել, որպեսզի դուրս չգրեն, իսկ հիմա մարմնիս մեջ ասեղներ կան, տարբեր մասերում, ամորձիս էլ վնասված է, սակայն հաշվի չառնելով իմ այդ վիճակը, ինձ դուրս են գրել ԴՀ-ից»:
Նա հայտնում է, որ հաշմանդամ է, հոգեկան հիվանդ, հաշվառված է «Ավան» հոգեբուժարանում, նախկինում բուժվել է Նուբարաշենի հոգեբուժարանում:
Դատապարտյալը խնդրում է լրատվամիջոցից, որ բարձրաձայնվի իր այս խնդրանքը, որպեսզի իրեն կրկին տեղափոխեն «Դատապարտյալների հիվանդանոց», սպառնալով, թե ասեղն այս անգամ …կմտցնի սիրտը, եթե չկատարեն իր խնդրանքը:
ԱՆ ՔԿՀ մամուլի պատասխանատու Գոռ Ղլեչյանը «Առավոտի» հարցին, թե ինչպե՞ս է գնահատվում դատապարտյալի առողջական վիճակը, ասաց. «Երեկ դատապարտյալը տեղափոխվել է քաղաքացիական հիվանդանոց՝ հետազոտման նպատակով: Մինչ այդ քրեակատարողական հիմնարկում գտնվելու ժամանակահատվածում նրա նկատմամբ եղել է դինամիկ բժշկական հսկողություն»: Գ.Ղլեչյանը խոստացավ բուժհաստատությունում հետազոտման արդյունքների մասին լրացուցիչ տեղեկացնել:
Կարդացեք նաև
Ռ. Մ.
«Առավոտ»
14,03.2017
