Տեղի է ունեցել ՀՀԿ գործադիր մարմնի նիստ, որում քննարկվել են թե արտաքին քաղաքական, թե ներքաղաքական, ինչպես նաեւ նախընտրական փուլում կուսակցության գործունեության հարցեր:
ՀՀԿ մամուլի խոսնակ Էդուարդ Շարմազանովը լրագրողներին տեղեկացրեց, որ նախագահ Սերժ Սարգսյանը ներկայացրել է ՌԴ կատարած իր այցելության եւ ունեցած բարձր մակարդակի հանդիպումների մանրամասները:
«Մենք արձանագրում ենք, որ հայ-ռուսական ռազմավարական դաշնակցային հարաբերությունները դինամիկ զարգանում են բոլոր ուղղություններով, որ կա մեծ ներուժ շարունակելու այդ հարաբերությունները թե քաղաքական, թե տնտեսական, թե մշակութային եւ հումանիտար ոլորտներում: Ընդհանուր տարածաշրջանային զարգացումների հետ կապված կա փոխըմբռնում: Դուք տեսաք, որ երկու պետությունների նախագահները նաեւ Արցախի հիմնախնդրի վերաբերյալ հանդես եկան համատեղ հայտարարությամբ, որով անթույլատրելի է համարվում խնդրի ռազմական լուծումը՝ հղում անելով Մինսկի խմբի համանախագահության ձեւաչափով երեք հայտնի սկզբունքների ձեւաչափով խնդիրների հանգուցալուծմանը», ասաց պարոն Շարմազանովը:
Հարցին, թե համացանցում հրապարակումներ են պտտվում, թե Վլադիմիր Պուտինն այս ընտրություններում սատարում է Սերժ Սարգսյանին, Էդուարդ Շարմազանովը պատասխանեց. «Դա համացանցի կարծիքն է, մենք չասացիք՝ դուք ասացիք: Ես մի բան կարող եմ ասել. ցանկացած պետություն, այն էլ՝ Դաշնակցային Հանրապետություն, շահագրգռված է իր դաշնակցի հետ հարաբերությունների զարգացմամբ շարունակականությունով: Գոնե վերջին 10 տարիների ընթացքում հայ-Ռուսական հարաբերությունները դինամիկ զարգացել են ի շահ երկու պետությունների եւ հայ-ռուսական հարաբերությունների զարգացման բոլոր ոլորտներում մենք նախ եւ առաջ հիմք ենք ունեցել Հայաստանի Հանրապետության ազգային ու պետական շահը»:
Կարդացեք նաև
Աշոտ ՀԱԿՈԲՅԱՆ
