2017թ-ի մարտի 26-ին կկայանա «Երեւանյան հեռանկարներ» միջազգային երաժշտական փառատոնի 18-րդ շրջանի բացումը: Մեկնարկը կտրվի լեգենդար ջութակահար, կրկնակի «Գրեմմի» մրցանակակիր Պինկաս Ցուկերմանի ելույթով: Երաժիշտը փառատոնի շրջանակներում Երեւանում հանդես է եկել «Ցուկերման Չեմբըր Փլեյրս» կամերային նվագախմբով եւ «Կամերատա Զալցբուրգ» նվագախմբի հետ: Երեւանում Պինկաս Ցուկերմանը հանդես կգա թավջութակահարուհի Ամանդա Ֆորսայտի եւ Հայաստանի ազգային ֆիլհարմոնիկ նվագախմբի հետ` դիրիժոր Էդուարդ Թոփչյանի ղեկավարությամբ, Արամ Խաչատրյան համերգասրահում:
Ծրագրում` Բրամսի Կրկնակի կոնցերտն է` ջութակի եւ թավջութակի համար եւ թիվ 4 Սիմֆոնիան: «Երեւանյան հեռանկարներ» միջազգային երաժշտական փառատոնի շրջանակներում այս տարի Երեւան կժամանեն Իսրայելի կամերային նվագախումբը, ճանաչված դաշնակահար Արկադի Վոլոդոսը` մենահամերգային ծրագրով, Մոսկվայի Չայկովսկու անվան մեծ սիմֆոնիկ նվագախումբը` ականավոր դիրիժոր Վլադիմիր Ֆեդոսեեւի ղեկավարությամբ, նաեւ 8 անգամ «Գրեմմիի» արժանացած Էմերսոն լարային քառյակը: Փառատոնային տարին կեզրափակի հայազգի մեծ բարեկամ դաշնակահար Եվգենի Կիսինի մենահամերգը: Նախատեսված են նաեւ վարպետության դասընթացներ` Բյուրականի ակադեմիայում եւ համերգներ մարզերում:
«Առավոտ»
17,03.2017
