Օրերս մահացած Արթուր Սարգսյանի՝ Հաց բերողի մահվան համար մեղավորներին պատժելու պահանջով բողոքի ցույցից հետո Շահեն Հարությունյանի առաջնորդությամբ մասնակիցները երթ սկսեցին դեպի կառավարության շենք:
Մինչ այս շենք հասնելը երթի մասնակիցները իրենց բողոք-պահանջը ներկայացրեցին գլխավոր դատախազության շենքի մոտ: Ապա, երբ նույնը փորձեցին անել արդարադատության շենքի մոտ, Երեւանի փոխոստիկանապետ Վալերի Օսիպյանը թույլ չտվեց՝ առանց հիմնավորման: Այս պահին երթի մասնակիցները արդարադատության շենքի մոտ են. Շահեն Հարությունյանի հետ զրույցում Օսիպյանը նորից կրկնեց՝ «Դուք բախում եք հրահրում»: Ապա, երթի մասնակիցների պնդմամբ, Օսիպյանը հիմնավորեց. «Դուք վստահություն չեք ներկայացնում, դուք թիրախավորում եք ոստիկանությանը, անհամաչափ գործողություններ եք անում: Ես պաշտոնապես հայտարարում եմ՝ մենք ցանկություն չունենք ձեզ հետ բախում, քաշքշուկ ստեղծելու: Եթե ցանկություն լիներ, ընդամենը 5-10 րոպե է հարկավոր ձեզ կարգի հրավիրելու: Իմ կապի միջոցը» ընկել էր գետնին, փորձում էինք վերցնել, ձեր երթի մասնակիցները հրմշտում էին: Ես վստահությունն եմ ասում»:
Ցուցարարներն էլ վստահեցրին՝ իրենք էլ ցանկություն չունեն բախումների:
Ապա Օսիպյանն ասաց. «Ներկայացնում եմ օրենքը՝ «ՀՀ ոստիկանության ծառայության մասին» օրենքի հոդված 22-ով ոստիկանությունն իրավունք ունի թե տրանսպորտային միջոցներին, թե քաղաքացիներին պարտադրի ժամանակավորապես հասարակական կարգը պահպանել այնտեղ, որտեղ ոստիկանությունը նպատակահարմար է գտնում: Ես նպատակահարմար եմ գտնում այստեղ»:
Կարդացեք նաև
Երթի մասնակիցներն էլ հակադարձեցին, որ ՀՀ Սահմանդրությունը չի արգելում ՀՀ քաղաքացիներին խաղաղ երթ անցկացնելու:
Երթի մասնակիցներն իրենց հայտարարությունն անելուց հետո շարունակեցին իրենց երթը:
Հիշեցնենք, որ Ազատության հրապարակից օրերս մահացած Արթուր Սարգսյանի՝ Հաց բերողի մահվան համար մեղավորներին պատժելու պահանջով բողոքի ցույցից հետո մասնակիցները երթ սկսեցին:
Նրանք պահանջում են արդարադատության նախարարի եւ գլխավոր դատախազի հրաժարականը, ինչպես նաեւ ՀՀ նախագահ Սերժ Սարգսյանի հրաժարականը: Ինչպես նաեւ, նրանք պահանջում են քրեական գործ հարուցել դատավոր Մկրտչյանի եւ Էդ. Հակոբյանի նկատմամբ:
Նելլի ԲԱԲԱՅԱՆ
