«Շահենի գլխից մազ պակասեց, ես դառնալու եմ մահապարտ». Կառավարության շենքի մոտ լարված իրավիճակ է

«Շահենի գլխից մազ պակասեց, ես դառնալու եմ մահապարտ». Կառավարության շենքի մոտ լարված իրավիճակ է

Ազատության հրապարակից մեկնարկած բողոքի ցույցի մասնակիցներն այս պահին Հանրապետության հրապարակում են: Նրանք երթով Մաշտոցի պողոտայում եկան կառավարության շենքի մոտ, եւ վարչապետի օգնականին հինգ րոպե ժամանակ են տվել, որպեսզի նա ներկայացնի իրենց պահանջի պատասխանը:

Հիշեցնենք, որ բողոքի ցույցը օրերս է մեկնարկել Արթուր Սարգսյանի՝ Հաց բերողի մահվան համար մեղավորներին պատժելու պահանջով: Իսկ կառավարությանը դիմել էին, որպեսզի թույլատրեն Արթուր Սարգսյանին հուղարկավորեն Եռաբլուրում:

Վարչապետի օգնականի այդպես էլ չներկայանալուց հետո երթի մասնակիցները Շահեն Հարությունյանի կոչով նստեցին Հանրապետության հրապարակում. Նրանք վանկարկում են՝ «Հաց բերողին սպանել են: Մարդասպան հեռացիր»:

Ոոստիկանությունը փորձում է ուժի գործադրմամբ նստածներին ոտքի բարձրացնել: Հրապարակում լարված իրավիճակ է:

Ցուցարարները գոռում են՝ «Մի տարեք, թողեք, ուր եք տանում մարդկանց»:

Ցուցարարներից մեկն էլ բարձրախոսով ասաց. «Եթե Շահենի գլխից մազ պակասեց, ես դառնալու եմ մահապարտ»:

Այս պահին ոստիկանության եւ ցուցարարների միջեւ հրմշտոց է: Ցուցարարներն ասում են՝ «Շահենին բռնել են», Շահենն ուր է»: Տեսադաշտում Շահեն Հարությունյանը չի երևում, ցուցարարներն անհանգստացած են, իսկ Օսիպյանն այս առնչությամբ որեւէ պարզաբանում չի տալիս:

Մոտ 10 րոպե հետո հայտնվեց Շահեն Հարությունյանը: Այնուհետև ցուցարարները որոշում են վաղը ժամը վեցին կրկին հավաքվել Ազատության հրապարակում:

Հիշեցնենք, որ ցուցարարները նաեւ պահանջում են արդարադատության նախարարի եւ գլխավոր դատախազի հրաժարականը, ինչպես նաեւ ՀՀ նախագահ Սերժ Սարգսյանի հրաժարականը: Ինչպես նաեւ, նրանք պահանջում են քրեական գործ հարուցել դատավոր Մկրտչյանի եւ Էդ. Հակոբյանի նկատմամբ:

 

Նելլի ԲԱԲԱՅԱՆ

 

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք