Գեղարքունիքի մարզի Գեղհովիտ գյուղում այսօր «Կոնգրես-ՀԺԿ» դաշինքի նախընտրական հավաքի ավարտին տարեցներից մեկը բանավեճի բռնվեց դաշինքի թեկնածու, ՀԱԿ փոխնախագահ Արամ Մանուկյանի հետ: Ծերունին ասաց, որ
ՀՀՇ-ն ժամանակին թալանել է երկիրը, ներկայիս ՀՀԿ-ն ու մյուս ուժերն էլ ՀՀՇ-ից են սերվել: Արամ Մանուկյանը նկատեց, որ տարեցը փոքր-ինչ զայրացած է: «Ի՞նչ զայրացած…Իմ ստանո՜կը…երեսուն տարի «տոկար» էի աշխատում, իմ ստանոկը բարձեցին պարսիկի մեքենան՝ ուղարկեցի՜ն…հիմա ո՞ւմ վստահեմ»,-բորբոքվեց ծերունին:
Արամ Մանուկյանը նկատեց, որ տղամարդու ասածներում ճշմարտություն կա, բայց պետք է նկատել, որ այդ տարիներին ՀՀՇ-ն եւ ժողովուրդն Արցախում 6000 զոհով 12000 կմ գրավեցին. «Հիմա ասում ենք, որ եկեք այդ տարածքն ու հաղթանակը պահենք: Դու քո ստանոկի դարդն ես անում, ես էլ ասում եմ, որ այսօր ՀՀ մեկ միլիոն քաղաքացի երկրում չէ»:
Կարդացեք նաև
Բանավեճն ավելի թեժացավ. բանը հասավ բղավոցներին: Պապիկն ասաց, որ կոմունիստական գաղափարախոսությանն է կողմ: «Ժողովրդի անունից մի՛ խոսա՝ կոմունիստ ես, կոմունիստ մնա…»,-կողքից միջամտեց գեղհովիտցիներից մեկը:
Ի վերջո, Արամ Մանուկյանն ու կոմունիստ-պապիկն իրարից ձեռքսեղմումով բաժանվեցին:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
