«Նոյյան տապան» լրատվական գործակալության մամուլի սրահում ասուլիսի հյուրն էր ազատամարտիկ, արցախյան պատերազմի մասնակից, ՀՀԿ ռեյտինգային ցուցակով առաջադրված ԱԺ պատգամավորության թեկնածու Վլադիկ Աբրահամյանը: 1999 թ.-ին ազատամարտիկը դարձյալ մասնակցել է խորհրդարանական ընտրությունների, սակայն, իր ձեւակերպմամբ, իրեն թույլ չեն տվել մտնել խորհրդարան:
Ասուլիսի ընթացքում Վլադիկ Աբրահամյանը ներկայացրեց իր ծրագրերը` Ազգային ժողովի պատգամավոր դառնալու դեպքում:
Նախ խոսեց արցախյան խնդրի մասին: Նրա կարծիքով Արցախի հարցում պետք է հասնել խաղաղության: «Պատերազմը հաղթող երկրի համար նույնպես պարտություն է»,- հավելեց Վլադիկ Աբրահամյանը:
Ազատամարտիկն անդրադարձավ երկրի սահմաններին: Նա նշեց , որ երկրի պաշտպանվածությունը պետք է հասցնել բարձր մակարդակի: Հետո ավելացրեց, որ իմաստ չունի 18 տարեկան զինվորին ուղարկել առաջին գիծ: Նաև խոսեց բժշկական ծառայությունների շատ թանկ լինելու մասին:
Կարդացեք նաև
Իր նախընտրական ծրագրում Վլադիկ Աբրահամյանը հիմնական շեշտը դրել է գյուղատնտեսության վրա: Նրա հավաստմամբ գյուղացին իրեն վաճառվող կալիումական պարարտանյութի կարիքը չի զգում: Իր գյուղատնտեսական ուսումնասիրությունների արդյունքում նա հասկացել է, որ մեր հողերի համար ավելի շատ անհրաժեշտ է ազոտական պարարտանյութ:
Այն հարցին, թե ինչու է հենց Հանրապետական կուսակցության ռեյտինգային ցուցակով առաջադրվել, Վլադիկ Աբրահամյանը պատասխանեց, որ այլ կուսակցության կողմից առաջարկ չի ստացել:
Ռոզա ԾԱՂԻԿՅԱՆ
