Հայաստանից Բելառուս տարանցիկ չվերթ իրականացնող օդանավում հայտնաբերվել են ռադիոակտիվ նյութեր. ինքնաթիռն ուղևորվում էր եվրոպական երկրներից մեկը: Ինչպես հաղորդում է Belta գործակալությունը, այս մասին հայտարարել է Բելառուսի նախագահ Ալեքսանդր Լուկաշենկոն՝ ռուս-բելառուսական համատեղ զորավարժանքները կազմակերպելու հարցով խորհրդակցությանը:
«Միջադեպերից մեկը կապված է օդանավում ռադիոակտիվ նյութերի հայտնաբերման հետ, որը Բելառուսի տարածքով Հայաստանից մեկնում էր եվրոպական երկրներից մեկը»,- հաղորդում է գործակալությունը՝ մեջբերելով Լուկաշենկոյի հայտարարությունը:
«Կխնդրեմ ինձ զեկուցել այսօր պետական սահմանին տեղի ունեցած այդ բոլոր միջադեպերի հետաքննության արդյունքների մասին: Այս ամենը վկայում է, որ մեզ ոչ մի դեպքում չի կարելի հանգստանալ: Մենք պետք է աչալուրջ լինենք և ոչ մի դեպքում թույլ չտանք, որպեսզի իրավիճակն ապակայունանա մեր երկրում»,- ասել է նախագահը:
