«Օհանյան-Րաֆֆի-Օսկանյան» դաշինքն այսօր քարոզարշավի շրջանակներում եղավ Վանաձորում: Այստեղ դաշինքի ներկայացուցիչներին դիմավորեցին աղ ու հացով, զուռնա դհոլով: Իսկ խաղաղության աղավնիները բաց թողեցին դեպի երկինք:
Դաշինքի ներկայացուցիչ, «Ժառանգություն» կուսակցության առաջնորդ Րաֆֆի Հովհաննիսյանն իր խոսքում ասաց, որ իրենք փորձելու են այնպես անեն, որպեսզի Հայաստանը դառնա «վերադարձի հայրենիք»:
«Մենք հանձն ենք առնում, որ մեր երկիրը պետք է դարձնենք ոչ թե փախուստի երկիր, այլ վերադարձի հայրենիք: Եւ պիտի գործենք, մինչեւ որ դա տեղի ունենա: Կարող է ընկնենք, բայց չենք ծնկելու: Դա վերաբերվում է եւ՛արտաքին թշնամուն, եւ՛ նաեւ մեր ներքին իրավիճակին: Ճակատում, դիվանագիտական սրահներում, փողոցում, բանտերում, մենք պայքարը տանելու ենք մեր քաղաքացիների իրավունքների եւ մեր ազգային շահի համար»:
Կարդացեք նաև
Վանաձորցիների հետ հանդիպման ժամանակ Րաֆֆի Հովհաննիսյանը խոսեց նաեւ նախընտրական շրջանում որոշ թեկնածուների կողմից իրականացված բարեգործությունների մասին. «Եթե որեւէ մեկն ուզում է բարեգործություն անել, հայ ժողովրդի, աղքատի, աղետի գոտու, զինվորի ու ազատամարտիկի, մեր երկրի շենացման համար, թող այն պաշտոնի հետ չկապի, թող քարոզարշավի մաս չկազմի, չկապի քարոզարշավի, պաշտոնի հետ: Իրական բարեգործը, դա անում է համեստ, պարկեշտ, լռելյայն: Եւ ես շատ հպարտ եմ, որ իմ տիկինը, իմ շեֆը՝ Արմենուհին, այդ գործով նաեւ զբաղվում են այս քաղաքում»:
Րաֆֆի Հովհաննիսյանը անդրադարձավ նաեւ վարչապետ Կարեն Կարապետյանի գործողություններին: Նրա կարծիքով վարչապետը սկսել է խոսել սխալների մասին: «Հեգնանքով չեմ ասում, լուրջ է, երեւի մեզնից կամ ուրիշներից բարետես եւ բարեկիրթ գործող վարչապետը, օրինակ վերցնելով սկսել է խոսել բացթողումների ու սխալների մասին: Իհարկե, տարոսն իշխող կուսակցության: Բայց, եթե ինքն իրապես անկեղծ է եւ ոչ թե հատուկ առաքելության վրա, ինքը պետք է ասի ոչ թե սխալ, կամ բացթողում, այլ, որ իր կուսակցությունն, իր կուսակցապետով հանդերձ պետական հանցագործությունների շարան է կատարել»:
Տաթեւիկ ՂԱԶԱՐՅԱՆ
