ՀՀԿ-ն քարոզարշավ է իրականացնում Արարատի մարզում: Արտաշատում ընտրողների հետ հանդիպմանը ԱԺ պատգամավոր, ՀՀԿ անդամ Արա Բաբլոյանն ասաց, որ արարատցիները ազնիվ, աշխատասեր, մարդասեր մարդիկ են, իսկ վարչապետ Կարեն Կարապետյանը հենց ազնվություն է քարոզում. «Լինենք ազնիվ, մեկս մյուսի նկատմամբ բարի, վերացնենք կաշառակերությունը, որի համար մենք այսօր ամաչում ենք: Սա շատ մտահարազատ է մեզ համար՝ արտաշատցիների համար, մարդիկ, որ աղա բնավորություն ունեն»:
Արա Բաբլոյանը արտաշատցիներին ասաց, որ հաճախ շատերը իրենց հարցնում են՝ Կարեն Կարապետյանը շարունակելո՞ւ է պաշտոնավարել. «Մենք հայտարարում ենք՝ եթե վերցնենք մեծամասնություն, Կարեն Կարապետյանը կլինի վարչապետ»:
Ինքը՝ Կարեն Կարապետյանը, վստահեցրեց, որ իրենք հաջողությամբ կատարել են 6 ամսվա ծրագիրը, որը ներկայացրել էին. «Ուզում եմ ձեզ հաշվետվություն տամ վիճակագրական, թե ինչ է կատարվել այս 6 ամսվա ընթացքում: 2017-ի երկու ամիսը համեմատելով 2016-ի հետ , ունենք հետեւյալ թվերը՝ առեւտրական ակտիվության 6.2 տոկոս աճ, արդյունաբերության 16.1 տոկոս աճ, ընդ որում, արդյունաբերության մեջ ունենք 109 տոկոս գյուղատնտեսության աճ, 130 տոկոս մետալուրգիայի աճ, 150 տոկոս խմիչքի արտադրութան աճ, 147 տոկոս IT ոլորտի աճ»: Նա ասաց, որ ապրանքների արտահանումն աճել է 20 տոկոսով. «Շատ տրամաբանական է, որ դուք հարց տաք՝ թվերը լավ են հնչում, բայց մեր կյանքի որակը չի փոխվել, թվերը նկարում եք կամ այլ մեկնաբանություն: Հարգելի ժողովուրդ, այսօրվա մեր սոցիալ-տնտեսական վիճակն այնպիսին է, որ մենք դեռ շատ քայլեր պետք է անենք, որ բերենք հասցնենք այն կետին, որից հետո որակական փոփոխություն է լինելու»:
Վարչապետն ասաց, որ եթե հողը երկար ժամանակ չի մշակվում, չի ջրվում, պետք է այդ հողն անընդհատ ջրեն, պարարտանյութ տան, որ սերմը ցանելուց հետո բերք տա:
Կարդացեք նաև
Վարչապետը քարոզարշավի իր ելույթից հետո արագ հեռացավ՝ չպատասխանելով Սամվել Բաբայանի ձերբակալման մասին լրագրողների հարցերին:
Հռիփսիմե ՋԵԲԵՋՅԱՆ
