Aravot.am-ը ՀՅԴ Բյուրոյի անդամ, Հայ Դատի եւ քաղաքական հարցերի գրասենյակի պատասխանատու Կիրո Մանոյանից հետաքրքրվեց` ինչ կարծիքի է ՊԲ բանակի նախկին հրամանատար Սամվել Բաբայանի ձերբակալության մասին:
«Իմ ունեցած տեղեկությունները շատ նախնական են: Եթե իսկապես դա կապված է այն գործի հետ, որով Ազգային անվտանգության ծառայությունը հրապարակել է տեղեկություն, թե Վրաստանի վրայով զենք են բերել Հայաստան, դա մտահոգիչ է, բայց մնացածի համար փաստեր են պետք: Չեմ կարող հավատալ, որ առանց որեւէ հիմքի են իրեն ձերբակալել, որովհետեւ մեր Ազգային անվտանգության ծառայությունն այդքան ապիկար չէ: Եթե իսկապես այդպիսի հանցագործություն կա, պետք է դեռ դատավարություն լինի: Ամեն դեպքում, մտահոգիչ է երեւույթը, խոսում է ուրիշ բաների մասին, բայց առաջ չընկնենք, երեւի ուրիշ փաստեր էլ կհրապարակեն, եւ դրանից հետո ավելի հեշտ կլինի կողմնորոշվելը»:
Հիշեցնենք, որ ի պատասխան տարբեր լրատվամիջոցների բազմաթիվ հարցումների՝ ՀՀ Ազգային անվտանգության ծառայության մամուլի կենտրոնը հայտնել էր, որ մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակներում ձերբակալված են 3 անձ, այդ թվում՝ ՀՀ քաղաքացի Սամվել Բաբայանը։
Գոհար ՀԱԿՈԲՅԱՆ
