«ԵԼՔ» դաշինքի պատգամավորի թեկնածուներ Ալեն Սիմոնյանն ու Արտակ Զեյնալյանն այսօր հրատապ ասուլիսով արձագանքեցին SUT.am-ի հրապարակած տեղեկությանը, ըստ որի հանրապետության բոլոր մարզերը և Երևանի բոլոր տարածքները ընդգրկող թվով 84 դպրոցների և 30 մանկապարտեզների տնօրեններ պատմում են իրենց հավաքագրած ցուցակների մասին:
Ըստ Արտակ Զեյնալյանի, խախտվել է Սահմանադրության երկրորդ եւ ընտրությունների վերաբերյալ հոդվածն ու մարդու իրավունքների եվրոպական կոնվենցիայի 3-րդ արձանագրության հոդվածը, որով պետությունը պարտավորվում է այնպիսի ընտրություն անցկացնել, որով ժողովրդի ազատ կամքն ազատորեն կարտահայտվի:
Ալեն Սիմոնյանն էլ ասաց, որ ըստ հրապարակված ձայնագրությունների, 84 դպրոցների տնօրեններ եւ 30 մանկապարտեզի տնօրեններ պատմում են, թե ուր են ներկայացրեց ընտրողների հավաքագրված ցուցակները. «թիվ 37 դպրոցի տնօրենն ասում է, որ ամուսնու հետ նույնիսկ վախեցնելով մոտ 1700 հոգանոց ցուցակ են հավաքել»:
Արտակ Զեյնալյանի խոսքով, ազատ ընտրությունների սկզբունքն է խախտվել, վարչական, հանրային ռեսուրսներն օգտագործվում են մի քաղաքական ուժի օգտին. «Կենտրոնական ընտրական հանձնաժողովը պարտավոր է վարույթ հարուցել ու անմիջապես արձագանքել այս խախտմանը, մի քանի հարյուր հաստատություններ, որոնք գտնվում են պետական կամ համայնքային ենթակայության տակ ներգրավված են գործընթացում ու սա ընդգրկում է ՀՀ ողջ տարածքը:
Կարդացեք նաև
Այն անունները, որոնք հիշատակվում են դպրոցների ու մանկապարտեզների տնօրենների կողմից, այդ թեկնածուների գրանցումը անվավեր ճանաչելու պահանջով ԿԸՀ-ն պետք է դիմի դատարան, որ հնարավոր լինի փրկել ընտրությունների պատկերը: Հիշատակվում են Արտակ Սարգսյանի, Վահրամ Բաղդասարյանի, Սեյրան Սարոյանի, Սամվել Առաքելյանի, Արման Սահակյանի անունները: Այդ թեկնածուների գրանցումը անվավեր չճանաչելու դեպքում այն ընտրատարածքներում, որտեղ նրանք թեկնածություն ունեն, արդեն իսկ վստահություն չի կարող ներշնչել»:
Ալեն Սիմոնյանն էլ ասաց, որ գոնե ժամանակավորապես, բայց պետք է կասեցվի նշված դպրոցների ու մանկապարտեզների տնօրենների պաշտոնները, որովհետեւ այդ մարդիկ խախտել են օրենքը. «Իրավապահ մարմինները, հիմք ընդունելով ԶԼՄ-ի կողմից հրապարակված տեղեկությունը, պետք է զբաղվեն այս դպրոցների հետ կապված բոլոր հարցերը քննելով, մեր բոլոր տեղամասերը գտնվում են դպրոցներում»:
Արփինե ՍԻՄՈՆՅԱՆ
