Մարտի 23-ին «Հայաստանի պատանեկան նվաճումներ» կազմակերպությունը «Ձեռնարկատիրական եւ քաղաքացիական կրթություն» դասընթացի շրջանակներում դրամաշնորհներ տրամադրեց 11 աշակերտական հ/կ-ների /ԱՀԿ-ներին/: Այդ հասարակական կազմակերպություններն են` Շիրակի մարզի Բասենի (Մուսայելյանի) միջնակարգ դպրոցի «Առաջնորդներ», Արմավիրի մարզի Բագարանի միջնակարգ դպրոցի «Պատանի բուսագետ», Արարատի մարզի Արարատի թիվ 5 միջնակարգ դպրոցի «Առաջընթաց», Վայոց ձորի մարզի «Քայլ առաջ», Լոռու մարզի Վանաձորի թիվ 16 հիմնական դպրոցի «Վերածնունդ», Կոտայքի մարզի Ջրաբերի միջնակարգ դպրոցի «Արեւներ», Արագածոտնի մարզի Արագածի թիվ 1 դպրոցի «Զարթոնք», Սյունիքի մարզի Գեղանուշի միջնակարգ դպրոցի «Արեգակ», Տավուշի մարզի Հաղարծինի միջնակարգ դպրոցի «Եղիցի լույս», Գեղարքունիքի մարզի Վարդենիկի կրթահամալիրի «Արմաթ» եւ Երեւանի Ալ. Շիրվանզադեի անվան թիվ 21 հիմնական դպրոցի «Երեւանը մենք ենք» ԱՀԿ-ները: Դրամաշնորհների հանդիսավոր հանձնման առաքելությունը սիրով ստանձնեց HSBC Բանկ Հայաստանի գլխավոր տնօրեն պարոն Փոլ Էդգարը: Ստացված դրամաշնորհային գումարները ԱՀԿ-ները կուղղեն տարաբնույթ հանրային եւ համայնքային ծրագրերի նախաձեռնմանը եւ իրականացմանը: Դրամաշնորհային մրցանակներին արժանանալու համար միմյանց հետ մրցակցել են հանրապետության բոլոր մարզերից ավելի քան 150 դպրոցների աշակերտական հասարակական կազմակերպություններ: Ներկայացված հայտ – առաջարկների ամփոփման արդյունքում էլ ընտրվել են այն 11 լավագույն աշակերտական կազմակերպությունները, որոնցից յուրաքանչյուրին շնորհվեց 150 000 ՀՀ դրամի չափով դրամաշնորհ:
Սեփ. լր.
«Առավոտ»
Կարդացեք նաև
24,03.2017
