Լրահոս
Օրվա լրահոսը

Մեր ընտրությունների սուրբ փարիսեցիները

Մարտ 26,2017 14:19

Եթե քաղաքականության մեջ չեղած, կուսական մաքրության տեր մեկը արցունքակալած աչքերով խոսի հայոց երազանքներից, Մեծ Հայքից, Արցախից, սահմանադրությունից կասես՝ լավ:

Բայց երբ հայ-թուրքական տխրահռչակ խաղերի նախաձեռնողներից ու Արցախի հողերը հանձնելու պատրաստ մեկը, որ 10 տարի եղել է ՀՀ բարձրագույն պաշտոնյաներից մեկը, որ հենց Մեծ Հայքի երազանքը թաղելու ու Հայաստանի հողերը հանձնելու պատրաստ բանակցություններ է վարել այդ տարիներին (իսկ հայ-թուրքական արձանագրությունները հենց այդ երազանքների վերջը դնող փաստաթուղթ է), ով չի ընդվզել հերթական սահմանադրական փոփոխություններից, որոնք արվել են իր պաշտոնավարման օրոք, ով կուսակցությունից դաշինք հետ ու առաջ է ցատկել ու ցատկում, հիմա ընտրությունների նախաշեմին ըմբոստացել է, հստակ տեսնում ես՝ փարիսեցի է: Դասագրքային, էտալոնային նմուշ:

Եւ երբ իր ասածների ու արածների միջև գոյություն ունեցող դիսսոնանսը փորձում է ծածկել եկեղեցու հասցեին անհեթեթ մեղադրանքներ շարադրելով, իբրև թե եկեղեցին դարձել է իշխանության շարունակականությունը և իբրև թե եկեղեցին պիտի վերադառնա իր պատմական առաքելությանը, ուզում ես դասականի բառերով ասել՝ չե՛մ հավատում:

Կարելի է մտածել, թե եկեղեցին փոխվել է սույն պարոնի պաշտոնանկությունից հետո, իսկ մինչ այդ ուրիշ էր: Մի՞թե այն ժամանակ կաթողիկոսը նույն Գարեգին Բ-ը չէր կամ, միգուցե այն ժամանակ նա, ասենք, ըըը… մորմո՞ն էր: Ո՛չ:

Այդ դեպքում ինչո՞ւ են հիմա նեղվում եկեղեցուց: Երևի որևիցե հատուկ ընտրազանգված են թիրախավորում: Չէ՞ որ աղանդավորներից շատերն էլ ընտրում են:

Կամ երբ պարոնն ասում է, թե եկեղեցին պիտի դառնա իր պատմական առաքելությանը, նա չի՞ պատկերացնում, որ եկեղեցու առաքելության ու կանոնի մեջ նզովքն ու բանադրանքը կոնկրետ տեղ են զբաղեցնում: Իսկ եթե մեր եկեղեցին դադարի այդքան հանդուրժող լինել իր հոտի որոշ ներկայացուցիչների հանդեպ ու նզովքի ենթարկի՞: Մանավանդ որ առիթ ու պատճառ միշտ կա:

Քաղաքական ծայրաստիճան անմաքուր խաղերի այս շրջանում անշնորհակալ գործ է թեկնածուներին քննադատելը, որովհետև քեզ անմիջապես կարող են մեղադրել հակառակ կողմին կամ կողմերին պաշտպանելու մեջ, բայց երբ անհարկի տեղը փորձում են միավորներ հավաքել եկեղեցուն հարվածելով, հնարավոր չի լռել ու հանդուրժել:

Աիդա ԳԵՎՈՐԳՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մարտ 2017
Երկ Երե Չոր Հնգ Ուրբ Շաբ Կիր
« Փետ   Ապր »
 12345
6789101112
13141516171819
20212223242526
2728293031