Այսօր «Սպուտնիկ Արմենիա» ակումբում հրավիրած ասուլիսում Օհանյան-Րաֆֆի-Օսկանյան դաշինքը գլխավորող Սեյրան Օհանյանը հայտարարեց, որ այս ընթացքում հարվածներ են եղել իրենց դաշինքի նկատմամբ, ճնշումներ՝ սկսած Ջրառատի դեպքերից մինչեւ Էջմիածնի դեպքերը, նաեւ Սամվել Բաբայանի հետ կապված գործընթացները. «Սամվել Բաբայանը մեր մարտական ընկերն է, գաղափարակից գործընկերը, որը տարբեր ժամանակաշրջանում իր հնարավորության սահմաններում աջակցել է մեզ»:
Նա ասաց, որ անհայտ է, թե ինչպես են ԱԱԾ-ի նյութերը նախօրոք հայտնվում ԶԼՄ-ներում եւ տարածվում. «Անհասկանալի է, որ կեղծ տեղեկություններ են տարածվում՝ չիմանալով, թե ինչպիսի գործընթացներ եւ փաստեր կան»: Նա հորդորեց զերծ մնալ այդպիսի տեղեկատվություն հրապարակելուց:
Սեյրան Օհանյանն ասաց. «Եթե կան տեղեկություններ, որ Բաբայանը կապ ունի «Իգլայի» հետ, թող տրամադրեն, մենք էլ իմանանք, եթե չեն տալիս, քաղաքական հետապնդումներ են Սամվելի նկատմամբ, նաեւ մեր դաշինքի նկատմամբ՝ քարոզարշավի ընթացքում: Սա ապացուցում է եւս մեկ անգամ, որ մեր դաշինքը վերահսկողությունից դուրս է, ունի ուժ»:
Վարդան Օսկանյանը հայտարարեց, որ երբեք ՀՀ-ում այսքան մասսայական եւ բացահայտ ընտրակեղծիքներ չեն եղել: Նա հիշեցրեց, որ իրենց դաշինքը «Իրազեկ քաղաքացիների միավորում» ՀԿ-ի փաստերի վրա հիմնվելով՝ դիմել է ԿԸՀ՝ ՀՀԿ-ի մասնակցությունը այս ընտրություններին չեղյալ համարելու, որովհետեւ դրանից ավելի բացահայտ կեղծիքներ հնարավոր չէ: Նա ասաց, որ արդեն բացահայտ մտնում են տները, խոստումներ են տալիս, արդեն գումարները տալիս են, ոչ ոք ոչնչից չի վախենում: Դա բավարար հիմք է, որ իրավապահ մարմիններն այս բոլոր հարցերով լրջագույնս զբաղվեն:
Կարդացեք նաև
Օսկանյանն ասաց, որ ի հեճուկս «Գելափի» հարցումների, իրենք էլ հարցումներ են պատվիրել եւ պարզել են, որ ՀՀԿ-ն շատ-շատ ցածր վարկանիշ ունի, «Առաջին տեղում բացահայտ առավելությամբ «Ծառուկյան» դաշինքն է, իսկ մենք ունենք բավական ծանրակշիռ տեղ»:
Րաֆֆի Հովհաննիսյանն էլ ասաց, որ ՀՀ-ն ունեցել է քաղբանտարկյալներ բոլոր իշխանությունների օրոք. «Պարզապես այսպես շարունակել չենք կարող»: Ինչ վերաբերում է Սամվել Բաբայանի ձերբակալությանը՝ նա ասաց, որ դա մեծ հարված է մեր ազգային անվտանգությանը:
Հռիփսիմե ՋԵԲԵՋՅԱՆ
