Ազատության հրապարակում այսօր ՕՐՕ դաշինքի հանրահավաքն ավարտվեց երթով: Երթի մասնակիցները «ամոթ» էին գոռում իշխանությունների հասցեին՝ քաղբանտարկյալներ ունենալու համար: Նրանք պահանջում էին նաեւ ազատություն ու վանկարկում՝ հաղթանակ:
Երթի առաջին գծում էր նաեւ ՊՆ նախկին նախարար, ՕՐՕ դաշինքի ներկայացուցիչ Սեյրան Օհանյանի կինը՝ Ռուզաննա Խաչատրյանը:
Նա «Ազատություն ռադիոկայանի» հարցին, թե ինչու որոշեց մասնակցել երթին պատասխանեց. «Ես միշտ Սեյրան Օհանյանի զինակից,գաղափարակից ու կյանքի ընկերն եմ, որտեղ կլինի նա, այնտեղ կլինեմ ես»:
Կարդացեք նաև
Անդրադառնալով մամուլի հրապարակումներին Սեյրան Օհանյանի նկատմամբ հնարավոր ճնշումներին, նույնիսկ ձերբակալությանը՝ տիկին Խաչատրյանն ասաց՝արհամարհում է այդպիսի արտահայտությունները, իսկ իր անունը մամուլում շրջանառելն էլ համարեց իշխանության կողմից արշավ իր դեմ. «Ես գտնում եմ՝ իշխանությունը պետք փոխվի, որովհետեւ ղեկին գտնվում են մարդիկ, որոնք կազմակերպում են տեռոր ընտանիքների ու հատկապես կանանց հանդեպ, եթե անհրաժեշտություն լինի, ես մամուլով հանդես կգամ, կներկայացնեմ փաստեր՝ ովքեր են եղել դրա կազմակերպիչները»:
«Ազատություն» ռադիոկայանի հարցին, թե մեկ տարի առաջ՝ իրեն կպատկերացնե՞ր ընդդիմադիր երթի առաջնորդ, որտեղ Սերժ Սարգսյանի պաշտոնանկության կոչեր են հնչում, պարոն Օհանյանը պատասխանեց. «Այնտեղ որտեղ ժողովուրդն է, ժողովրդի հետ միասին ենք, ես ինձ պատկերացրել եմ զինվորի, ժողովրդի հետ: Հարաբերական հասկացություն է՝ ով է ընդդիմություն, ով է իշխանություն… ապրիլի երկուսին է ձեւավորվելու իշխանություն եւ ընդդիմություն»:
Պարոն Օհանյանը չբացառեց «Ծառուկյան» դաշինքի հետ կոալիցիան, ասաց՝ իրենց պատրաստակամությունը բարձրաձայնել են: Նա պնդեց ՀՀԿ-ի հետ կոալիցիա չկազմելու իրենց հայտարարությունը՝ պարզաբանելով, որ փոփոխություններ են պետք. «Նույն ՀՀԿ-ի հետ չեմ կարծում, որ խորը փոփոխություններ են լինելու, դրա համար մեր ուժը պետք է ձեւավորենք»:
Հետընտրական հնարավոր զարգացումների վերաբերյալ հարցին էլ պարոն Օհանյանը պատասխանեց՝ կուզենար, չլինեն ընտրակեղծիքներ ու մեծ խախտումներ, բայց իրենք կլինեն ժողովրդի կողքին, ժողովուրդն ինչ թելադրի, այն էլ կանեն:Խաղաղ ճանապարհով, օրենքի գնով հասնել ամեն ինչի:
Արփինե ՍԻՄՈՆՅԱՆ
