«Առաջին նախագահի հայեցակարգը նույնն է, որը մերժվեց 1998թ-ին: Ի՞նչ է ի վերջո ասում առաջին նախագահը: Ասում է՝ «հանձնվեք, քանի դեռ չենք վերացել»: Սա ռազմի դաշտում գտնվող զինվորի ամենավատ որոշումն է, որը կարող էր նա կայացնել»,-Նոր Նորքում այսօր նախընտրական հավաքի ավարտին Aravot.am-ի եւ Tert.am-ի հետ զրույցում անդրադառնալով «Կոնգրես-ՀԺԿ» դաշինքի առաջնորդ, ՀՀ առաջին նախագահ Լեւոն Տեր-Պետրոսյանի երեկվա հարցազրույցին, ասաց ՀՅԴ պատգամավորի թեկնածու, ՀՀ բնապահպանության նախարար Արծվիկ Մինասյանը:
«Մենք չենք մերժում խաղաղությունը, բայց խաղաղությունը չի կարելի մուրալ: Չի կարելի ակնկալել խաղաղություն, երբ դիմացդ կանգնածը (նկատի ունի Ադրբեջանին,-խմբ.) պատրաստ է քեզ հոշոտել»,-հավելեց Մինասյանը:
Արձագանքելով Տեր-Պետրոսյանի այն դիտարկմանը, թե հակառակ դեպքում Կոսովոյի բախտին կարժանանանք, Արծվիկ Մինասյանը նշեց. «Կներեք, բայց մեր ժողովուրդն արդեն անցել է այդ «բայղուշական» մոտեցումներով: Երբ համեմատվել ենք այս կամ երկրի կամ իրավիճակի հետ, միշտ պարտություն ենք կրել: Տեր-Պետրոսյանն ասում է, թե մենք Ղարաբաղը չենք հանձնում Ադրբեջանին, այլ հանձնում ենք միջազգային հանրությանը: Բայց ո՞վ է այդ միջազգային հանրությունը եւ ո՞ւմ է մինչեւ հիմա երաշխավորել»:
Նախարարը մեկնաբանեց նաեւ առաջին նախագահի այն համոզմունքը, թե Արցախյան հակամարտության լուծման փոխզիջումային տարբերակին՝ «Մադրիդյան սկզբունքներին» «ոչ» ասողները՝ «ոչմիթիզհողականներն» են իրական դավաճանները: «Վստահ եմ, որ այդ արտահայտությունը մեզ (նկատի ունի ՀՅԴ-ին.-խմբ.) չի վերաբերում, բայց չեմ կարող չասել՝ այն բառապաշարը եւ քաղաքական հնարքները, որոնք վերջին օրերին կիրառում է առաջին նախագահը, վկայում են այն բանի մասին, որ այդ քաղաքական ուժի հանդեպ հասարակության մեծամասնությունը հույս չունի»,- համոզմունք հայտնեց Արծվիկ Մինասյանը:
Կարդացեք նաև
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
