Շնորհանդեսը կազմակերպել էր Աթայան-Բեժանյան ընտանիքը Սարյանի տուն-թանգարանի հետ համատեղ: Ռեժիսոր, սցենարիստ Տիգրան Խզմալյանը խոսում էր Էդուարդ Աթայանի մասին, ներկայացնում նրա կյանքն ու ստեղծագործությունները: Նա կարդաց հեղինակի մի քանի բանաստեղծություններ` մեկնաբանելով և համեմատելով դրանք համաշխարհային և ռուսական գրական ստեղծագործությունների հետ:
Էդուարդ Աթայանի բանաստեղծությունների ժողովածուն կազմել էին Նատալյա Աբրահամյանը և Ջեմմա Բեժանյանը: Վերջինիս խոսքով մի փոքր դժվար էր դա անել, քանի որ նա երկրից դուրս էր գտնվում և Նատալյայի հետ ընտրում էին ստեղծագործությունները Skype-ի միջոցով:
Տիգրան Խզմալյանի խոսքի դադարների ժամանակ դաշնակահար Վիլլի Սարգսյանը` Էդուարդ Աթայանի մոտ ընկերը, նվագում էր Կոմիտասի ստեղծագործությունները: Վիլլի Սարգսյանը նշեց, որ ընտրել են հենց Կոմիտասի ստեղծագործությունները, քանի որ Էդուարդ Աթայանը միշտ հիացմունքով ու պաշտամունքով էր լսում Կոմիտաս: «Կոմիտասը Էդուարդի համար սրբություն է եղել»,- հավելեց դաշնակահարը:
Կարդացեք նաև
Հյուրերից մեկը կարդաց Էդուարդ Աթայանի բանաստեղծություններից մի քանիսը: Կոմիտասի երաժշտությամբ էլ եզրափակեցին ցերեկույթը:
Ռոզա ԾԱՂԻԿՅԱՆ
