Էդուարդ Շարմազանովն Արամ Մանուկյանին հորդորում է լսել Լեւոն Զուրաբյանի հայտարարությունները
«Սահմանադրական բարեփոխումներից հետո առաջին ընտրությունները կայացան`ՀՀ-ին հաջողվեց նոր ԸՕ-ի հիման վրա կազմակերպել ժողովրդավարական, թափանցիկ, մրցակցային ընտրություններ: Սա բոլորիս հաջողությունն է եւ անկախ նրանից թե քանի՞ կուսակցություն կամ դաշինք կլինեն խորհրդարանում, Հայաստանի ժողովրդավարական զարգացման ճանապարհն անքննելի փաստ է»,- քիչ առաջ, լրագրողների հետ զրույցում հայտարարեց ԱԺ փոխնախագահ, ՀՀԿ խոսնակ Էդուարդ Շարմազանովը`ամփոփելով երեկ կայացած խորհրդարանական ընտրությունների նախնական արդյունքները:
Էդուարդ Շարմազանովն ասում է`ստացվող նախնական տվյալները դրական են ՀՀԿ-ի համար: Հիշեցնենք, 203 տեղամասերի արդյունքներով ՀՀԿ-ն մոտ 48 տոկոս ձայն է ստացել: Սա ԱԺ փոխնախագահին հիմք է տալիս հայտարարել` անվիճելի է, որ ՀՀԿ-ն առաջատար քաղաքական ուժ է:
«Կոնգրես-ՀԺԿ» դաշինքի անդամ Արամ Մանուկյանը հայտարարել էր, որ առնվազն 200 հազար մարդ ավել է քվեարկել: Նա լուրջ կասկածներ էր հայտնել մասնակցության նման ակտիվության մասով:
Կարդացեք նաև
Aravot.am-ի այդ դիտարկմանը Էդուարդ Շարմազանովը հիշեցրեց, որ ընդամենը երեկ նույն դաշինքից Լեւոն Զուրաբյանը հավաստիացնում էր, որ գործնականում, նման ընտրական օրենսգրով անհնար է որեւէ կեղծիք: Նա Արամ Մանուկյանին հորդորեց`հայտարարություններ անելուց առաջ ուշադիր հետեւել սեփական քաղաքական ուժի ներկայացուցչի հնչեցրած հայտարարություններին:
ԵԼՔ դաշինքի երկրորդ հորիզոնականը զբաղեցնող Արամ Սարգսյանն էլ հայտարարել էր, որ համամիտ չի էկզիթ-փոլի արդյունքների հետ: Այդ առիթով էր ԱԺ փոխնախագահը տարակուսանք հայտնեց. «Էկզիթ-փոլով ԵԼՔ-ը կարծեմ 10 տոկոս էր, չէ՞: Համամիտ չէ՞, այսինքն`ԵԼՔ-ն ավելի քի՞չ է ստացել»:
Այլ մանրամասներն ավելի ուշ`տեսանյութում
Լրագրողներից մեկն էլ հետաքրքրվեց, ՀՀԿ-ն կշարունակի՞ ՀՅԴ-ի հետ կոալիցիան, թե՞ միանձնյա կկառավարի, քանի որ նախնական արդյունքները հուշում են, որ ՀՀԿ-ն բացարձակ առաջատար է լինելու: Համաձայնելով դիտարկման հետ, Էդուարդ Շարմազանովը հորդորեց, այնուհանդերձ սպասել պաշտոնական եւ վերջնական արդյունքներին:
Ինչ մնում է ՀՅԴ-ի հետ կոալիցիային, ասաց`ՀՅԴ-ի հետ հարաբերությունները ռազմավարական են, բայց ընտրությունների վերջնական արդյունքները ցույց կտան: Իր անձնական կարծիքն այն է`ճիշտ կլինի, որ շարունակվի ՀՅԴ-ի հետ կոալիցիոն գործընկերությունը:
Նելլի ԳՐԻԳՈՐՅԱՆ
