Ադրբեջանը եվրոպական երկրներում լոբբիստական աշխատանք է տանում, միջազգային մամուլի էջերում անգամ տեղեկություններ են հրապարակվում, որ Եվրախորհրդարանի այս կամ պատգամավորին են կաշառել: Ֆրանսիայում ի՞նչ աշխատանք է տարվում Ադրբեջանի իշխանությունների ռազմատենչ քաղաքականության վերաբերյալ ավելի հստակ ու ճշգրիտ պատկերացումներ ներկայացնելու ուղղությամբ, հարցրեցինք Ֆրանսիայի հայկական կազմակերպությունների համակարգող խորհրդի (CCAF) համանախագահ, «Nouvelles d’Arménie» ամսագրի խմբագիր Արա Թորանյանին, որը Երեւան է ժամանել:
«Հստակ է, որ Ադրբեջանը գնալով ավելի է կազմակերպվում, նրանք բավական միջոցներ ունեն, շատ ակտիվ են նաեւ Ֆրանսիայում: Ադրբեջանի եւ Ֆրանսիայի միջեւ կարեւոր առեւտրատնտեսական պայմանագրեր կան, եւ անշուշտ Ադրբեջանը փորձում է չարաշահել տնտեսական այդ հարաբերությունները` որպես լծակ քաղաքականության նկատմամբ: Փորձում ենք ընդդիմանալ այդ քաղաքականությանը, Ֆրանսիայի իշխանությունների հետ մեր բոլոր հանդիպումներում աջակցում ենք Լեռնային Ղարաբաղին: Բայց չպետք է խաբվենք` միլիարդների ներդրումների ծրագրեր կան: Սակայն, իհարկե, մեր ուժը` մեր գաղութն է», նշեց մեր զրուցակիցը` հավելելով, որ հաջողել են Հայաստանի համար մի շարք ձեռքբերումների հասնել, օրինակ, Հայոց Ցեղասպանության նկատմամբ դիրքորոշման հարցում:
Անդրադառնալով ապրիլի քառօրյա պատերազմից հետո ռազմական հնարավոր գործողություններ բռնկմանը` Արա Թորանյանը հավելեց. «Մենք գործի ենք դնում մեր ձեռքի տակ եղած բոլոր միջոցները, որպեսզի նեցուկ կանգնենք Ղարաբաղին: Երբ Ալիեւը Ֆրանսիա ժամանեց` բողոքի ցույցեր կազմակերպեցինք Փարիզում, Լիոնում եւ Մարսելում: Կապի մեջ ենք Ֆրանսիայում Հայաստանի դեսպանության եւ Լեռնային Ղարաբաղի ներկայացուցչության հետ, փորձում ենք նրանց կապերն ուժեղացնել ֆրանսիական շրջանակների հետ: Օրինակ, մեր կապերը Ֆրանսիայի քաղաքական էլիտայի հետ օգտագործեցինք, որպեսզի նրանցից ոմանք այցելեն Ղարաբաղ, ֆրանսիական մամուլում հրապարակումներ լինեն` Ղարաբաղի վերաբերյալ, որը չափազանց կարեւոր է: Պարզ է, որ Ադրբեջանի միջոցները չունենք, որը դրամով ուղղակի «գնում» է եվրոպացի պատգամավորների: Մենք տեսնում ենք, որ նրանք շատ ակտիվ են նաեւ Ֆրանսիայում եւ որ Ֆրանսիան նրանց համար մեծ կարեւորություն ունի»:
Ֆրանսիայի հայկական կազմակերպությունների համակարգող խորհրդի (CCAF) համանախագահ, «Nouvelles d’Arménie» ամսագրի խմբագիր Արա Թորանյանի հետ բացառիկ հարցազրույցն ամբողջությամբ` կարդացեք ապրիլի 5-ի տպագիր «Առավոտ»-ում:
Կարդացեք նաև
ԷՄՄԱ ԳԱԲՐԻԵԼՅԱՆ