«ԱՄՆ-ն վերադառնում է սիրիական հակամարտություն: Սա նախազգուշական հարված էր՝ բավականին գրագետ կերպով իրականացված: Հարվածից առաջ նախազգուշացվել են ռուսական կողմը, տարածաշրջանում ԱՄՆ դաշնակիցները: Այն իրականացվել է այնպես, որ հնարավորինս քիչ մարդկային կորուստներ լինեն: Այդ հարվածը պատասխան էր՝ սիրիական կառավարությանն ու նրա արտաքին հովանավորներին»,-«Պոստ Սկրիպտում» մամուլի ակումբում այսօր անդրադառնալով ԱՄՆ-ի կողմից այսօր սիրիական կառավարական ավիաբազային օդային հարվածներ հասցնելու դեպքին, ասաց արաբագետ Արմեն Պետրոսյանը:
Նրա գնահատմամբ՝ միջադեպը սիրիական հակամարտության հանգուցալուծման գործում խորը հետեւանքներ չի ունենա, եթե Ռուսաստանը խնդիրը տեղափոխի դիվանագիտական հարթություն. «Իմ կարծիքով, իրավիճակը դեպի դիվանագիտական հարթություն է գնալու: Ռուսաստանը չի գնա սրացման՝ չնայած ավիահարվածների առնչությամբ քննադատական հայտարարություններին»:
Կարդացեք նաև
Արաբագետն անդրադարձավ նաեւ Սիրիայում օրերս քիմիական զենքի կիրառմանը՝ ընդգծելով, որ դեռ պարզ չէ՝ ովքեր են դա կատարել. «Բացառվում է, որ Ասադի իմացությամբ է իրականացվել այդ գրոհը: Այն առավելապես ձեռնտու է սիրիական ընդդիմությանն ու արտաքին հովանավորներին՝ Պարսից ծոցի արաբական երկրներին: Նրանց պետք էր իրավիճակ փոխել, քանի որ դուրս էին մնացել սիրական ներքին ու արտաքին գործընթացներից»:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
