Առջեւում Սուրբ Զատիկն է, եւ սեղաններին կլինեն ձուկն ու փլավը: Եթե ցանկանում եք ինչ-որ նոր բան փորձել, առաջարկում եմ այս անգամ ձուկը ոչ թե եփել, այլ մարինացնել նարնջով եւ թարմ կանաչիով:
Անհրաժեշտ մթերքները
1-1,5 կգ-անոց իշխան (փոքրիկ ձկները այս ուտեստի համար պիտանի չեն, անպայման պետք է գտնել խոշոր ձուկ)
Աղ (ցանկալի է ծովի աղ)- 2 ճաշի գդալ
Շաքարավազ (ցանկալի է եղեգնաշաքար` շագանակագույն շաքարավազ)- 1 ճաշի գդալ
Սեւ պղպեղ- 1 թեյի գդալ
Հազրեվարդ- 1-2 ճյուղ (կարող եք փոխարինել սամիթով կամ թարխունով)
Նարինջ-1 հատ
Պատրաստման եղանակը
Կարդացեք նաև
Մաքրած եւ լավ լվացած իշխանից առանձնացրեք ֆիլեն: (Գլուխը, ոսկորները եւ կաշին կարող եք եփել եւ հրաշալի ձկնապուր պատրաստել):
Մեկ ձկից ստացվում է երկու կտոր ֆիլե:
Ի դեպ, իշխանի փոխարեն, եթե, իհարկե, հնարավորությունները ներում են, կարող եք վերցնել թարմ սաղմոնի ֆիլե:
Լավ լվացած նարնջի կեղեւը քերեք մանր անցքերով քերիչով: Փոքրիկ ամանի մեջ լավ խառնեք շաքարավազը, աղը, պղպեղը եւ նարնջի կեղեւը:
Ապակե տարայի հատակին ցանեք այդ խառնուրդի կեսը, վրան դրեք ձկան ֆիլեները: Վրան լցրեք խառնուրդի մնացած մասը: Կեղեւահան նարնջից քամեք նաեւ հյութը եւ լցրեք ձկան վրա: Վերջում` թարմ կանաչին: Այսքանից հետո ծածկեք ձուկը պոլիէթիլենե թաղանթով կամ սննդի համար նախատեսված պլաստիկ ամանով, վրա դրեք որեւէ ծանրություն (ես, օրինակ, նման դեպքերի համար ունեմ խոշոր գետաքարեր), եւ դրեք սառնարան:
Արդեն 24-26 ժամից ձուկը լիակատար պատրաստ կլինի օգտագործման համար, սակայն 2-3 օր հետո` շատ ավելի համեղ է: Նկատենք, որ մեկ շաբաթից ավելի պետք չէ պահել ձուկը, թեեւ, խիստ կասկածում եմ, որ այն հենց առաջին իսկ օրը չի վերջանա:
Կարող եք մատուցել ինչպես բարակ շերտերով կտրատած, ասենք` սեւ հացով եւ կարագով, այնպես էլ` փոքրիկ կտորներով` ավոկադոյի եւ կիտրոնի հետ նախուտեստ դարձրած (լուսանկարում այդ տարբերակն է): Նկատենք նաեւ, որ մատուցելուց առաջ անհրաժեշտ է ձուկը չորացնել եւ վրայից մաքրել ավելորդ համեմունքները:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
08.04.2017
ինչ որ ալ անես, որքան որ ալ որակաւոր եւ թարմ լինի, հում ձուկը միշտ ել անախորժ «հոտ» մը ունի… նաեւ, ակռայի տակ խանգարիչ հյուսվածք մը…
փուռի մէջ եփածը լաւագոյնն է
սակայն ճաշակի հարց է, անշուշտ