Այսօր (բանաստեղծություն)

Այսօր (բանաստեղծություն)

ՄԵՐՈՒԺԱՆ

Art politicus

Ա

Եվ կա մի երկիր մատնված սովի,

Որտեղ արեւը ելնում է ծովից

Ու մայր է մտնում հորիզոններում:

Նրա երկնքում կան ծխոտ ամպեր

Եվ քնքշության մեջ՝ արցունքներ թովիչ:

Հիմա չեմ կարող հաշվել մտովի

Այն տաճարները, որ աներկրային

Աղոթքներ են հար առաքում Աստծուն:

Այս երկիրը, որ ուներ իմաստուն

Եվ խորհրդավոր այրեր բյուրավոր,

Այսօր ապրում է մտքեր մուրալով,

Իսկ վաղը պիտի դառնա կորուսյալ,

Թե շարունակի մեզ իշխել Ռուսիան:

 

Բ

Ասպատակվում ենք՝ գաղթում ենք հոգով,

Այլակերպվում ենք՝ դառնում մեզ օտար,

Վարկեր ենք առնում տոկոս առ տոկոս,

Որ սերունդներին թողնենք ի կտակ,

Որպեսզի նրանք լինեն վարձակալ

Իրենց սեփական հայրենի հողում:

Այսպես՝ տալիս ենք գույք պարտքի դիմաց

Եվ ջրահեղձի նման փրփուրից

Փորձում ենք հուսալ փրկության եզերք,

Քանզի նավավար չունենք բանիմաց:

Այսպիսի օրեր երբեք չի տեսել

Ոչ մի ժողովուրդ հաղթանակ տարած,

Ինչպիսին մենք ենք՝ այսօր զոհ դառած:

 

Գ

Մնում է միայն խորհել մի վայրկյան՝

Դեպի ու՞ր գնալ, ու՞մ դառնալ գերի,-

Նրանց, որ կուզեն մեր ցեղը հայկյան

Բնաջինջ անել ու տալ հողմերին,

Թե՞ ապավինել ներքին թուրքերին,

Որ նույն նվաստն են ու նույնքան անարգ,

Որ քառասուն պորտ թուրք են ավելի,

Քան բազմադարյան ախոյանը մեր:

Այս դրության մեջ անելանելի,

Եվ անառաջնորդ այս երկրում անզոր,

Ինչպե՞ս անծանոթ ուժերին դիմել,

Որ մեր փոխարեն ճգնեն հասկանալ

Մեռնել-ապրելեւ խնդիրը այսօր:

 

Դ

Ուրեմն, ելնենք մաքառման ճամփա

Եվ անսանք խոսքին մեր նախնիների՝

Ազատվենք դավից անմիտ ու անբան

Եվ ամբարտավան այս նախիրների:

Տառապյալների մեր երթը անդարձ

Թող քայլի դեպի հաղթական ավարտ,

Երթա աննահանջ եւ անտարակույս,-

Խեղճին ներշնչի ապրելու հավատ

Եվ կեղեքվածին՝ վերապրելու հույս,

Որ հեռու մեկնած մարդիկ տարագիր

Կարոտով դառնան հայրենի երկիր,

Եվ վերածնվի ազգային ոգին՝

Արագած լեռան ծաղկավառ գոգին:

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

 
Առցանց Առավոտի լուրերին facebook-ով բաժանորդագրվելու համար սեղմեք