Տավուշի մարզի ընդհանուր իրավասության առաջին ատյանի դատարանի Բերդի նստավայրում շարունակվում է Տավուշի մարզի Բերդի տարածաշրջանի սահմանամերձ Վերին Կարմիրաղբյուր գյուղի բնակիչ Արսեն Խոջոյանի դատավարությունը: Նա մեղադրվում է 2016թ. հունիսի 24-ին Վերին Կարմիրաղբյուր գյուղում 17-ամյա Աստղիկ Հանիսյանին դանակի բազմաթիվ հարվածներ հասցնելու մեջ:
Այդ հարվածները հանգեցրել էին Բերդի բժշկական կենտրոն տեղափոխված անչափահաս աղջկա մահվան: ՀՀ քրեական օրենսգրքի 104 հոդվածի 1-ին մասով («Սպանությունը») մեղադրվող 25-ամյա Արսեն Խոջոյանի շահերը պաշտպանում է հանրային պաշտպան Աննա Մեժլումյանը:
Արսենը մտերիմ հարաբերություններ է ունեցել 17-ամյա աղջկա հետ: Հունիսի 24-ին Ա. Խոջոյանն Աստղիկ Հանիսյանին հրավիրել է Բերդի «Ուռենի» սրճարան, հյուրասիրել, ապա միասին գնացել են Վերին Կարմիրաղբյուր գյուղի «Ճակատի աղբյուր» տեղանք, ուր տեղի է ունեցել դեպքը: Հավելենք, որ մինչ այդ Արսեն Խոջոյանը Սեւանի տարածաշրջանում վարձով հովիվ է աշխատել:
Ա. Խոջոյանի դատավարության ապրիլի 4-ի նիստին ներկա են եղել Ա. Խոջոյանի հարազատները, Աստղիկ Հանիսյանի մայրը, գործով վկաները ցուցմունքներ են տվել: Ա. Խոջոյանը հրաժարվել է դատարանում ցուցմունք տալ: Հրապարակվել են նրա նախաքննական ցուցմունքները: Ա. Խոջոյանը չի առարկել դրանց դեմ, անուղղակիորեն ընդունելով իր մեղքը: Դատարանում ցուցմունք տված Աստղիկ Հանիսյանի մայրն ասել է՝ ինքը համոզված չէ, որ Արսենն է իր աղջկան սպանել: Դատավոր Զոյա Զաքինյանը նրան հիշեցրել է այդ կնոջ նախաքննական ցուցմունքն այն մասին, որ Վերին Կարմիրաղբյուրում, դեպքի վայրում ծանր վիրավոր Աստղիկ Հանիսյանը մորն ասել է, որ իրեն դանակի հարվածներ հասցնողը Ա. Խոջոյանն է:
Կարդացեք նաև
Այդ գործով դատական հաջորդ նիստը նշանակված է ապրիլի 18-ին:
Ոսկան ՍԱՐԳՍՅԱՆ
