«Բոլորդ Արաբկիրի ընտրություննե՞րն էիք նայում, կինո էր, կինո»,- այսօր ԱԺ ճեպազրույցի սկզբում լրագրողներին ասաց ՀԱԿ խմբակցության քարտուղար Արամ Մանուկյանը:
Նա հայտարարեց, որ այս ընտրությունները աննախադեպ էին, ամեն ինչ արեցին, որ ոչնչացնեն ազատ մարդուն. «Սպիտակի երկրաշարժի զոհերը էդ օրվա մեղավորների պատճառով չէին, հաճախ ուրիշների մեղքերի համար տուժում են հազարավոր անմեղ մարդիկ: ՀՀ-ում մեզ դա է սպասվում՝ սեփական քաղաքացու ոչնչացումը անհետեւանք չի մնալու»:
Արամ Մանուկյանն ասաց, որ Արտակ Սարգսյանի՝ ՍԱՍ-ի Արտակի ձայնագրությունում էլ ակնհայտ է, որ սպառնալիքներ են եղել այս ընտրություններում: Այդ ձայնագրությունը ՀԱԿ-ը նույնպես կցել է Սահմանադրական դատարանի դիմումին: Ըստ Արամ Մանուկյանի, Արտակ Սարգսյանը քրեական հանցագործություններ է թույլ տվել,. «Օրենքի խախտումների առնվազն 5-6 հոդված կար»:
Հարցին՝ արդյոք իշխանության պատվերո՞վ չէր այդ ձայնագրությունները հրապարակվում՝ Արամ Մանուկյանը պատասխանեց, որ չի կարող ասել, թե ովքեր են այդ նյութերը դրել. «Այն, որ իշխանության ներսում էլ գնում է գզվռտոց եւ ասվում է, որ շատ ձայն հավաքածները կարող է դիմում գրեն, դուրս գան…ոչ միայն ՀՀԿ-ում, այլ խմբակցությունում էլ է նույն պատկերը: Արժանի են, թող իրար ուտեն»:
Կարդացեք նաև
Արամ Մանուկյանը հին հունական ասացվածք հիշեց՝ ստրուկը ստրուկ է, որովհետեւ ինքը ոչ թե ազատություն է ուզում, այլ իր սեփական ստրուկն է ուզում. «Այս մարդիկ իրենց ստրուկն են ուզում»:
Ըստ նրա, սա Հայաստանի համար ներքին պարտվողական պատերազմ է, մենք պարտվել ենք մեզ: Սեփական երկրում սեփական իշխանությանը պարտվելը շատ ավելի վատ պատմություն է»:
Հարցին, թե ինչու Արտակ Սարգսյանի այդ ստորացուցիչ ժողովի ժամանակ որեւէ մեկը չընդվզեց՝ Արամ Մանուկյանը պատասխանեց, որ ձայնագրությունը հրապարակելն արդեն ընդվզել է, եւ երբ մարդը երեխայի հացի, կոշիկի խնդիր ունի, դժվար է ձայն բարձրացնել, հատկապես, որ ուրիշների ծափերը ահավոր ճնշող էին, այդ ծափերի ներքո ով ընդվզեր՝ կծվատեին:
Հռիփսիմե ՋԵԲԵՋՅԱՆ
