Նախնական տվյալների համաձայն՝ Թուրքիայի բնակչության մեծ մասը սահմանադրական հանրաքվեում քվեարկել է նախագահի լիազորությունների ընդլայնման և երկրի կառավարման կարգը խորհրդարանականից նախագահականի փոխելու օգտին, գրում է Meduza.io-ն:
Քվեաթերթիկների 90 տոկոսի հաշվարկի արդյունքում բարեփոխմանը կողմ է արտահայտվել Թուրքիայի քաղաքացիների 52 տոկոսը, դեմ՝ 47,6 տոկոսը: Քվեարկությանը մասնակցել է քվեարկելու իրավունք ունեցողների 80 տոկոսը:
Հանրաքվեի անցկացման նախաձեռնությունը պատկանում է երկրի գործող նախագահ Ռեջեբ Թայիփ Էրդողանին: Հաշվի առնելով քվեարկության արդյունքները՝ նա կարող է երկիրը կառավարել մինչև 2029թ-ը: 2019թ. տեղի կունենան հերթական նախագահական ընտրությունները, նախագահի լիազորությունների ժամկետը սահմանվում է 5 տարով, մեկ մարդն իրավունք ունի այդ պաշտոնը զբաղեցնել անընդմեջ երկու ժամկետից ոչ ավել: Էրդողանի կառավարման ժամկետը օրենսդրության փոփոխությամբ զրոյացվում է:
Սահմանադրական բարեփոխումների արդյունքում Թուրքիայում լուծարվում է վարչապետի պաշտոնը: Նախագահն իրավունք է ստանում նշանակել նախարարներին և Սահմանադրական դատարանի գրեթե բոլոր դատավորներին, ցրել խորհրդարանը և սահմանել արտակարգ դրություն:
Կարդացեք նաև
Թուրքիայում Էրդողանն իշխանությունն իր ձեռքում է պահում 2003թ-ից, երբ զբաղեցնում էր վարչապետի պաշտոնը: 2014թ-ից նա երկրի նախագահն է:
Պատրաստեց՝ Վիկտորյա ԱՆԴՐԵԱՍՅԱՆԸ
