ՀՀ դատախազության տարածած հաղորդագրությամբ՝ ՀՀ Տավուշի մարզի դատախազությունում քրեական գործ է հարուցվել Անտառային ֆոնդի տարածքներում՝ բնության հատուկ պահպանվող տարածք հանդիսացող «Դիլիջան Ազգային Պարկ» ՊՈԱ կազմակերպության «Հաղարծին» տեղամասի 6-րդ պահաբաժնում առանձնապես խոշոր չափի ապօրինի ծառահատում կատարելու դեպքի առթիվ:
ՀՀ բնապահպանության նախարարության «Դիլիջան Ազգային Պարկ» ՊՈԱ կազմակերպության կողմից սպասարկվող տարածքում ապօրինի ծառահատումների վերաբերյալ «Դիլիջան ազգային պարկի հատված ծառերը» հրապարակման հիման վրա դատախազի հանձնարարությամբ նախապատրաստված նյութերով պարզվել է, որ վերոնշյալ տարածքում ապօրինի հատվել են 100 տարբեր տեսակի և տրամագծի ծառեր, ինչի հետևանքով պետությանը պատճառվել է առանձնապես խոշոր չափի՝ 18.906.474 ՀՀ դրամ վնաս:
Տավուշի մարզի դատախազի կողմից ՀՀ քրեական օրենսգրքի 296-րդ հոդվածի 3-րդ մասով հարուցվել է քրեական գործ: Նախաքննությունը հանձնարարվել է ՔԿ-ին:
Տավուշի մարզի դատախազ Վիկտոր Գրիգորյանին հարցրինք, թե հատուկ պահպանվող տարածք հանդիսացող «Դիլիջան ազգային պարկում» ինչպե՞ս են ճշտել հատված ծառերի քանակը, որոշել դրա հետեւանքով պատճառված վնասի ստույգ չափերը: Նա ասաց, որ կան հատված կոճղեր, 10 օր ստուգումներ են կատարել, պատճառված վնասի չափը որոշել է ՀՀ բնապահպանական պետական տեսչությունը: Մարզի դատախազն ասաց, որ ապօրինի անտառախախտումների գործով Տավուշի մարզում, ըստ ամենայնի, էլի քրեական գործ է հարուցվելու:
Կարդացեք նաև
Ոսկան ՍԱՐԳՍՅԱՆ
