«Հեռու Գոշից» նախաձեռնության անդամների եւ Բնապահպանության նախարար Արծվիկ Մինասյանի հետ նախորդ հանդիպումից հետո թյուր տեղեկատվություն է տարածվել, թե իբր նախարարն ասել է՝ երեք օրում կվերացնեն այն իրավիճակը, որն առաջացել է Գոշ լճի տարածքում: Այս մասին այսօր նախարարությունում բնապահպանների հետ հերթական հանդիպմանը հայտարարեց Արծվիկ Մինասյանը: Նախարարի խոսքով՝ իրականում ինքն ասել է, որ երեք օրում ծառայողական քննությունը կավարտվի:
Հիշեցնենք, որ լճի տարածք էր մուտք գործել շինարարական տեխնիկա, հարթեցրել լիճ տանող ճանապարհը:
«Գործողություններն այս պահին դադարեցվել են: Որեւէ վարքագիծ այնտեղ չի կարող դրսեւորվել վարձակալի կողմից, քանի դեռ վերջինիս ծրագիրը օրենքով չի կազմվել եւ չի անցել բնապահպանական փորձաքննություն»,-տեղեկացրեց նախարարը:
Կարդացեք նաև
Նրա փոխանցմամբ՝ նկատողություն է հայտարարվել անտառապահին. «Նա առնվազն պետք է տեղեկացված լիներ եւ համարժեք գործողություն իրականացներ կամ զեկուցեր այդ մասին»: Արծվիկ Մինասյանը նաեւ տեղեկացրեց, որ Գոշ լճի ափին ձեւավորված տիղմը կտեղափոխվի, տարածքը կմաքրվի: Նրա հավաստմամբ՝ հետեւելու են, որպեսզի վարչական պատասխանատվության ենթարկվի նախաձեռնողը, որն առանց փորձաքննության իրականացրել է գործողություններ:
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
