Լրահոս
Օրվա լրահոսը

«Դուք պարտավոր եք մշտապես հիշել քաջորդիներին, շարունակել նրանք կիսատ թողածը»

Ապրիլ 23,2017 10:15

Քարեգահ գյուղի «Սոսե» բարեգործական մանկապարտեզի սան Արմինկա Աղաբեկյանը մասնակից էր համայնքապետարանի կազմակերպած հուշ-ցերեկույթին՝ նվիրված անցած տարվա ապրիլյան քառօրյայում հերոսաբար մարտնչած ու մարտիրոսված տղաներին: Փոքրիկ աղջնակը Հայոց Եռագույնն էր պահել ձեռքերում և իր ավագ ընկերների՝ համայնքի միջնակարգ դպրոցի աշակերտների հետ Արցախի սահմանն իրենց արյամբ անառիկ պահած տղաներին էր փառք տալիս:

Արցախի Հանրապետության Քաշաթաղի շրջանն առաջիններից էր, որ արձագանքեց անցած ապրիլյան դեպքերին, ու հազարից ավելի կամավորներ, այդ թվում նաև քարեգահցիները՝ հանդեսին մասնակից երեխաների հայրերն ու պապերը, եղբայրները, հասան առաջնագիծ:

Գյուղի Սմբատ Թաթոսյանի անվ. պատանեկան, երիտասարդական կենտրոնում էին համայնքի բնակիչներ, ուսուցիչներ, աշակերտներ, հյուրեր: Պատին քառօրյայում մարտիրոսված տղաների նկարներն էին՝ «Իմ գարունները քոնն են, հայրենիք» խորագրի տակ: Սկզբում հնչեց Արցախի Օրհներգը, եղավ լռության րոպե: Այնուհետև աշակերտները հանդես եկան երգով, բանաստեղծություններ արտասանեցին՝ նվիրված քաջերին, եղավ նաև ռազմական պար:

Յուրաքանչյուր մարտիրոս-զինվորի համար հնչեցին առանձին խոսքեր՝ նկարագրելով նրանց սխրանքը: Եղավ նաև փոքր բեմականացում՝ «Բալլադ զինվորի մասին» վերնագրով:

Հանդեսի ավարտին շրջվարչակազմի աշխատակազմի մշակույթի և երիտասարդության հարցերի բաժնի վարիչ Հարութ Ավաննեսյանը կարևոր համարեց նման միջոցառումները՝ ասելով, որ այն կայացավ հետաքրքիր ձևաչափով:

Համայնքի ղեկավար Մարինե Պետոյանը գոհունակություն հայտնեց երեխաներին, որ կարողացան լավ ներկայացնել նորօրյա հերոսներին: Նշեց, որ ապրիլ ամիսին մեր ժողովուրդը շատ ցավ է տեսել, և 2016-ին նույնպես այն չարիք բերեց հային; Սակայն, այդ օրերը եղան հերոսական, քանի որ կային Ռոբերտի, Քյարամի, Նորիկի, Գոռի, Հենրիկի, մնացած անձնուրաց տղաների պես քաջորդիներ:

Դիմելով հանդեսի մասնակիցներին՝ Մ. Պետոյանն ասաց.

–Դուք պարտավոր եք մշտապես հիշել քաջորդիներին, շարունակել նրանք կիսատ թողածը: Նայում եմ տղաների նկարներին, ժպտերես ու տխրադեմ, առնական ու մանկական դեմքերով: Տարբեր են դեմքերը նրանց, սակայն հոգիները նույնն են՝ քաջությամբ ու հայրենասիրությամբ լի: Ընկան տղաները՝ իրենց մարմինը դարձնելով ասպար ու վահան Հայոց սահմանին: Ընկան, որ թուրքը չխանգարի հայ երեխաների անդորրը, ընկան՝ պաշտպանելով իրենց մայրերի ու քույրերի պատիվը, անվտանգությունը, երկրի խաղաղությունը: Շատերն այսօր իրենց տանը պետք է լինեին կամ մարտական հենակետում; Սակայն մեկ տարի առաջ անմահացան ու ամենուր են, Հայոց բոլոր տներում, դպրոցներում, մանկապարտեզներում… Ողջ հայությունն է ճանաչում նրանց, ովքեր ևս մեկ անգամ հաստատեցին հայոց ոգու հզորությունը:

Միջոցառման կազմակերպիչ, համայնքապետարանի ակումբավար Ա. Աղաբեկյանը շնորհակալություն հայտնեց դպրոցի անձնակազմին, որ իրականացավ հուշ-ցերեկույթը, ներկաներին, որ մասնակիցը եղան քաջերի փառաբանմանը:

Զոհրաբ ԸՌՔՈՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Ապրիլ 2017
Երկ Երե Չոր Հնգ Ուրբ Շաբ Կիր
« Մար   Մայիս »
 12
3456789
10111213141516
17181920212223
24252627282930