Aravot.am-ին հայտնի դարձավ, որ Գյումրու «Արգո» խանութի մոտ 102-րդ ռուսական ռազմաբազայի պայմանագրային զինծառայող 21-ամյա Դմիտրի Յալպաևի սպանության մեջ կասկածվող, 1996 թվականին ծնված Ջ.Ա-ն, որը հոգեկան որոշ խանգարումներ ունի, զինվորական ծառայության ընթացքում ճանաչվել է սահմանափակ մեղսունակ, Ստեփանավան քաղաքից է:
Թե ինչու է հայտնվել Գյումրիում ու ինչու է սպանել զինծառայողին, որին բացարձակապես չի ճանաչում, վերջինս Գյումրու ոստիկանության «Մուշ» բաժնում երևակայական, ֆանտաստիկ վարկածներ է առաջ քաշել: Նա առաջին իսկ պահից զարմացրել է իրեն բերման ենթարկող ոստիկաններին՝ հայտարարելով, որ մուսուլման հայ է:
Ինչևէ, ըստ ոստիկանության մեր աղբյուրների, Ստեփանավանից Գյումրի եկած երիտասարդը, տեսնելով, «Արգո» խանութից դուրս եկող զինծառայողին, հարձակվել, սուր-կտրող ծակող գործիքը խրել է նրա պարանոցը: Շրջակայքի մարդիկ արագ արձագանքել են: Նրանք, տեսնելով այս դաժան տեսարանը, հասել են, բռնել վերջինիս. փորձել են պահել մինչև վրա կհասնի ոստիկանությունը. ծեծկռտուք տեղի է ունեցել հենց այս ժամանակ: Մարդիկ փորձել են օգնել նաև զինվորականին, սակայն նրա կյանքը փրկել հնարավոր չի եղել:
Այս դեպքով ոչ միայն հարցաքննվել է կասկածյալ Ջ.Ա-ն, այլ ականատես-վկաները: Ստեփանավանից եկած երիտասարդը եղելէ մենակ, նրան ուղեկցող անձինք չեն եղել:
Նշենք, որ Գյումրիում մտածմունքի թեմա է դարձել այն, թե ինչպես կարող են հոգեկան շեղում ունեցող երիտասարդին, որը բանակում ծառայելու ընթացքում մի քանի անգամ ինքնախեղում է կատարել, ծառայությունից ազատվել հոգեկան խնդիրների պատճառով, թույլատրեն ազատ ման գալ: Օգտատերերից մեկը գրում է. «Ով պիտի պատասխան տա օրը ցերեկով սառնասրտորեն վիզ կտրելու ի վիճակի մարդուն հասարակության մեջ ազատ պտտվելու թույլտվություն տալու համար… Որևէ մեկը պատասխան չպիտի տա՝ իհարկե: Միանշանակ է, որ այդ երիտասարդը վտանգավոր է բոլորիս համար, այսօր պարզապես ճակատագրական դուրս եկավ երիտասարդ ռուս զինվորականի համար»:
Կարդացեք նաև
Հիշեցնենք, ըստ քննչական կոմիտեի տարածած հաղորդագրության. «Նախնական քննությամբ պարզվել է, որ կասկածյալն ունի հոգեկան առողջության հետ կապված որոշ խնդիրներ։ Մասնավորապես՝ զինվորական ծառայության ընթացքում՝ 2016 թվականի նոյեմբերին, մի քանի անգամ կատարել է ինքնախեղում, և նեղ մասնագիտական հետազոտման նպատակով տեղափոխվել է ՀՀՊՆ Երևանի կայազորային հոսպիտալի հոգեբուժական բաժանմունք:
Նրա նկատմամբ նշանակվել է ռազմաբժշկական և դատահոգեբուժական ամբուլատոր համալիր փորձաքննություն:
2017թ. մարտի 9-ին ՀՀՔԿ ԶՔԳՎ 9-րդ կայազորային քննչական բաժնում ստացվել է թիվ 12 եզրակացությունը, համաձայն որի ՝ նրա մոտ փորձաքննության ժամանակ հայտնաբերվել են հոգեկան որոշ խանգարումներ, ճանաչվել է սահմանափակ մեղսունակ և ոչ պիտանի զինվորական ծառայության համար խաղաղ ժամանակ։ Պաշտպանության նախարարի հրամանով 2017 թվականի մարտին նա զորացրվել է»:
Նունե ԱՐԵՎՇԱՏՅԱՆ
