Շիրակի, ինչպես նաև Լոռու մարզի բնակիչներն ու պաշտոնյաները 1915 թվականի Ցեղասպանության անմեղ զոհերի հիշատակը հարգեցին Ջարդի կամ Հերհերի ձորում, որտեղ ըստ պատմական տվյալների, 1915-1918թթ. դաժանորեն սպանվել են Ալեքսանդրապոլի և Ղարաքիլիսայի շրջանի բնակիչները: Կանանց ու երեխաներին ժայռերից գլորել են ձորը, տղամարդկանց էլ ցած նետել՝ սրատելով: Հայ պաշտոնյաներից բացի այստեղ էին նաև 102-րդ ռազմաբազայի ու սահմանապահ զորքերի հրամանատարությունը, ռուսական հյուպատոսարանի ներկայացուցիչները, Գյումրիում ռուս հոգևորականը: Մարդիկ գալիս էին մանկահասակ երեխաների հետ, քիչ չէին նաև այն տարեցները, որոնց հիշողություններում դեռ թարմ են իրենց հարազատների բնաջնջման դաժան պատմությունները:
Շիրակի դաշնակցական մարզպետ Հովսեփ Սիմոնյանը լրագրողների հետ զրույցում ասաց, թե միայն հզոր պետություն կառուցելով կարող ենք այս ամենին դիմակայել: «Եթե չունեցանք հզոր պետություն, մեր ձայները ոչ մեկն էլ չի լսելու: Լսելու են ուժեղին, որոնք որ ի վիճակի են պարտադրել իրենց խոսքը լսելու»,-ասաց մարզպետը:
Կարդացեք նաև
Aravot.am-ը Հովսեփ Սիմոնյանից հետաքրքրվեց, թե ինչպե՞ս է վերաբերում ջահերով երթի ժամանակ Թուրքիայի դրոշները այրելուն: «Սա էլ ինչ-որ մի ձևով վերաբերմունք է, վերաբերմունք մի պետության խորհրդանիշի նկատմամբ, որը մինչև այսօր չի դատապարտում, երբ որ նույն Թուրքիան Թալիաթին, մյուսին դատապարտեց մահվան, էսօր փորձում են ներկայացնել, որ ընդհանրապես ոչինչ չկա: Եվ հարգել էդ պետության դրոշը, չգիտեմ ինչքանով ճիշտ կլինի»,- ասաց մարզպետը:
Հովսեփ Սիմոնյանի կարծիքով հայի տեսակը փոխվել է, դարձել է ավելի ուժեղ, ապրիլյան պատերազմը դրա վառ օրինակն է: Ըստ նրա, հիշելով պիտի սգալ, բայց սգալով ուժեղանալ: «Էնպես չէ, որ հիմա եկել ենք, լալիս ենք, թե դուք մեզ կոտորել եք, եկել ենք, ասում ենք՝ դուք անզեն մարդ եք կոտորել, ի վիճակի չեք կոտորելու, երբ որ մենք զենք ունենք», ասաց Հովսեփ Սիմոնյանը:
Նունե ԱՐԵՎՇԱՏՅԱՆ
