Երեւանի ճանապարհատրանսպորտային ցանցում կարգ ու կանոն հաստատելը, պարզվում է, այնքան էլ դժվար չէ։ Այդ են վկայում նաեւ վերջին շրջանում կատարվող դրական տեղաշարժերը։
Այսօր մայրաքաղաքում գրեթե չեն հանդիպում ճանապարհի որեւէ հատվածում կանգառ կատարող երթուղային մեքենաներ։ Դրանով հանդերձ, ասել, որ ընդհանրապես այս ոլորտում այլեւս խնդիրներ չկան, անշուշտ, ճիշտ չի լինի։ Վիճակը քիչ թե շատ բարելավվել է միայն Երեւանի կենտրոնում, որտեղ ճանապարհատրանսպորտային ոստիկանությունը իրականացնում է մշտական հսկողություն։
Այնուհանդերձ փաստ է, որ քաղաքային իշխանությունը դեռ լուրջ անելիքներ ունի։ Կանգառներում մշտապես կարելի է ականատես լինել շարված երթուղային տաքսիների, որոնք շատ հաճախ խցանումների պատճառ են դառնում։
Թեպետ վերջին տարիներին հասարակական տրանսպորտը համալրվեց առանձին երթուղիները սպասարկող ավտոբուսներով, այնուհանդերձ դրանց թիվը սահմանափակ է։ Ավելին՝ որոշ ավտոբուսային երթուղիներում երբեմն դրանք օրերով չեն հանդիպում։
Կարդացեք նաև
Այդ պայմաններում միկրոավտոբուսների առատությունը միանգամայն հասկանալի է։ Չկարողանալով համարժեք փոխարինող գտնել՝ քաղաքային իշխանությունն առայժմ ապավինել է երթուղայիններին, որոնց մեծ քանակը լրացուցիչ խոչընդոտ է դարձել մայրաքաղաքի հագեցած տրանսպորտային սահմանափակ ցանցի համար։
Երեւույթը հատկապես նկատելի դարձավ, երբ ավելացավ Հայաստան ներկրվող ավտոմեքենաների թիվը։ Դրանք հիմնականում շահագործվում են Երեւանում, ինչի հետեւանքով մայրաքաղաքում կտրուկ մեծացել է տրանսպորտային միջոցների քանակը՝ հաճախ հանգեցնելով խցանումների։ Չնայած փորձը ցույց է տալիս, որ խցանումները շատ հաճախ ոչ այնքան տրանսպորտային միջոցների առատության, որքան անկանոն երթեւեկության հետեւանք են։
Ս. Տոնոյան
Հոդվածն ամբողջությամբ կարդացեք «Հայոց Աշխարհ» օրաթերթի այսօրվա համարում
