Ապրիլի 25-ին Երևանում կայացավ «Լվովի հայկական տաճարի վերածնունդը» վերնագիրը կրող ցուցահանդեսը։ Այն նվիրված էր Լեհաստանում հայկական համայնքի ձևավորման 650-ամյակին։ Հայաստանի ազգային պատկերասրահում ներկա էին Լեհաստանի դեսպանատան ներկայացուցիչները, որոնց անմիջական աջակցության շնորհիվ էլ կազմակերպվել է ցուցահանդեսը։
Հայաստանի ազգային պատկերասրահի տնօրեն Արման Ծատուրյանը իր բացման խոսքում փոքրիկ պատմական ակնարկ կատարեց,նշեց,որ հայերը միշտ մեծ արտոնություններ են ունեցել Լեհաստանում. «Հայերի համար միշտ հատուկ պայմաններ էին ստեղծվում։ Քանի որ ձևավորվել էր մեծ համայնք, հենց նրանց ջանքերի շնորհիվ էլ 14-րդ դարում ստեղծվեց այս հիանալի եկեղեցին, որն այսօր ՅՈՒՆԵՍԿՕ-ի պաշտպանության ներքո է»։
2007 թվականից սկսած Լեհաստանի կառավարության ջանքերի շնորհիվ եկեղեցին սկսեց նկարազարդվել։ Գեղեցիկ նկարները լեհ հայտնի նկարիչների աշխատանքներն են։
Կարդացեք նաև
Հայաստանում Լեհաստանի արտակարգ և լիազոր դեսպան Եժի Մարեկը իր խոսքը սկսեց Ցեղասպանության մասին հիշատակելով և նշեց,որ նա իսկապես կիսում է հայերի ցավը. «Այսօր բացում ենք ցուցահանդես, որը նվիրված է մեր պատմության ավելի լավատեսական դրվագին։ Հայերը երբեք չեն հետապնդվել Լեհաստանում իրենց հավատքի կամ ազգության համար,ընդհակառակը,հայերը մշտապես մեծ ներդրում են ունեցել քաղաքական ,մշակութային կյանքում»։
Արման Ծատուրյանն ասաց, որ այս ցուցահանդեսը այսօր շրջում է ամբողջ Լեհաստանով, ցույց է տալիս հայ-լեհական բարեկամության խոսուն վկայությունը։
Ցուցահանդեսը բաց կլինի մինչև մայիսի 27-ը։
Լիդիա ԿԱՐԱՊԵՏՅԱՆ
