Արդեն 2-րդ տարին է, ինչ Հայաստանում անցկացվում է Step by step մրցույթը: Ինչպես Aravot.am-ի հետ զրույցում նշեց ժյուրիի նախագահ, Երևանի Կոմիտասի անվան պետական կոնսերվատորիայի պրոֆեսոր, կոմպոզիտոր Նարինե Զարիֆյանը, Step by step-ը երգի մրցույթ է, որին մասնակցում են ինչպես պրոֆեսիոնալ, այնպես էլ ոչ պրոֆեսիոնալ երգիչներ:
«Իմիջիայլոց, մենք մրցույթից հետո երեխաներին չենք թողնում իրենց ճանապարհի կեսին եւ հետեւում ենք մինչեւ վերջ նրանց ստեղծագործական ուղուն, ուղղորդում մեր խորհուրդներով, ոգեւորում, շեշտելով, որ մեզ մոտ չկան հաղթողներ եւ պարտվողներ»,-հայտնեց ժյուրիի նախագահը:
Նա տեղեկացրեց, որ մի քանի փուլով անցկացված մրցույթի գալահամերգին են մոտենում, եւ իրենք երգիչների մեջ բավականին աճ են նկատել:
«Իրենց մոտ ճաշակ է ձեւավորվում, եւ ես որպես նախագահ, հենց սկզբից նրանց ասել եմ, որ ցածրորակ եւ վատ որակի երգեր չեն երգվելու, հակառակ պարագայում մասնակիցը դուրս կմնա մրցույթից: Եվ երեխաները պատրաստեցին այնպիսի երգացանկ, որտեղ ցածրորակ երաժշտությունը բացակայում էր»,- հավելեց մեր զրուցակիցը:
Կարդացեք նաև
Նաեւ հիշեցրեց, որ մրցույթի առաջին փուլում մասնակիցներն ազատ էին երգի ընտրության մեջ, կարող էին նաեւ համաշխարհային հիթեր հնչեցնել, մյուս փուլը նվիրված էր հայ կոմպոզիտորների ստեղծագործություններին, ժողովրդական ու հայրենասիրական երգերին:
Նարինե Զարիֆյանի համոզմամբ, այս տարվա մրցույթի մասնակիցներն անհամեմատ ուժեղ են նախորդ տարվա մասնակիցներից. «Նրանց մեջ պատրաստի արտիստներ կան, որ կարող են զարդարել ցանկացած բեմ»:
Գոհար ՀԱԿՈԲՅԱՆ
Լուսանկարը՚ https://aad.am կայքից:
