Գլխավոր դատախազության լիազոր ներկայացուցիչ Կարեն Բիշարյանն այսօր Սահմանադրական դատարանում հայտարարեց, որ ընտրությունների ժամանակ դիտորդական առաքելություն իրականացրած տասնյակ մարդիկ առ այսօր չեն վճարվել իրենց կատարած աշխատանքի դիմաց: Նման դիմում ստացվել է Գլխավոր դատախազությունում:
Կարեն Բիշարյանը չհրապարակեց դիմումատուի անուն-ազգանունը, բայց մանրամասնեց, որ ըստ կազմակերպությունների`«Թրանսպարեսնի ինթերնեյշնլ»-ի եւ «Իրավունքի Եվրոպա»-ի հետ կնքված պայմանագրերի, դիտորդական առաքելություն իրականացրած անձինք պետք է վճարվեին ընտրություններից հետ, 15-օրյա ժամկետում:
Մանրամասները` տեսանյութում
Կարդացեք նաև
Այս հայտարարությունը Գլխավոր դատախազության ներկայացուցիչն արեց`հերքելով նախօրեին Կոնգրես-ՀԺԿ դաշինքի ներկայացուցիչ Լեւոն Զուրաբյանի այն պնդումը, թե իրենք դատախազություն չեն դիմել, քանի որ չեն վստահում այդ կառույցին:
«Տիկին Նաղդալյանն իր կարծիքն է հայտնել…. Լավ չմեկնաբանեմ, բայց սա ընտրակաշառքի մասին հայտարարություն չէ»,-ասաց դատախազության ներկայացուցիչը`պարզաբանելով այն, որ ՍԴ ներկայացված իր դիմումին դաշինքը կցել է նաեւ ԱԺ փոխնախագահ Հերմինե Նաղդալյանի հայտնի հարցազրույցն այն մասին, որ ընտրակաշառքը նվիրատվություն է:
«Կիսո՞ւմ եք»,- հարցրեց Լեւոն Զուրաբյանը Կարեն Բիշարյանին: Հարցն անպատասխան մնաց:
Դիմումին կցված է նաեւ ԱԺ փոխնախագահ Էդուարդ Շարմազանովի հարցազրույցը, որում նա չի բացառել, որ ընտրակաշառք հնարավոր է, որ բաժանվել է: Սա էլ իբրեւ հիմք ներկայացնելը, դատախազության ներկայացուցիչը անհեթեթ է համարում:
«Փորձ է արվել ՍԴ ներկայացնել ընտրախախտումների մեծաքանակ կամ ուռճացված պատկեր»,- ասաց նա`հավելելով, որ դաշինքից դիմումներ չստանալն էլ հիմք է տալիս ենթադրել, որ իրենք ոչ թե չեն վստահել Գլխավոր դատախազությանը, այլ իրենք հավատացած չեն եղել իրենց հաղորդագրության իսկության մեջ:
Նա մանրամասնեց, որ դատախազությունում աշխատանքային խումբ է ստեղծվել, ութ դատախազով, թեժ գիծ է գործել, միջգերատեսչական աշխատանքային խումբ էլ է գործել եւ մամուլի հրապարակումների մշտադիտարկում անցկացվել: Ուսումնասիրվել են 541 հրապարակումներ: Դրանց ճնշող մեծամասնությունն, ըստ դատախազության ներկայացուցչի, ընդհանրական բնույթ է կրել, նախընտրական քարոզչության խախտումներին են նվիրված եղել, անորոշ ձեւակերպումներ են պարունակել, ընտրական սենյակների կահավորմանն են վերաբերվել եւ այլն:
309 ահազանգ էլ ոստիկանությունից է ստացվել, դրանք էլ են ուսումնասիրվել:
19 դեպքով քրեական գործ է հարուցվել, 12-ը ընտրակաշառքի դեպքով, երեքը`լրագրողների լիազորությունների իրականացումը խոչընդոտելու: 10 անձի մեղադրանք է առաջադրվել:
Դատախազության ներկայացուցիչը պնդում է, որ ահազանգերից շատերը թյուրիմացություններ են եղել: Դա հետագա հարցումներից է պարզվել:
«Գալան 9\7 տեղամասում բաց քվեարկության մասին լուր է հրապարակել, բայց հենց Կոնգրես-ՀԺԿ դաշինքի ներկայացուցիչն այդ տեղամասում հերքել`ասելով, որ նման բան չկա»,-ասաց դատախազության ներկայացուցիչը:
Նելլի ԳՐԻԳՈՐՅԱՆ
