Լրահոս
Օրվա լրահոսը

Հայաստանի դեմոկրատական կուսակցության հարցադրումներն` հայկական շուկայում ադրբեջանական խնձորի «առեղծվածային» հայտնության կապակցությամբ

Ապրիլ 28,2017 14:02

Վերջին օրերին հայկական շուկայում ադրբեջանական խնձորի «առեղծվածային» հայտնությունը և այդ առիթով պատկան մարմինների իրարամերժ ու անհեթեթ «պարզաբանումները» հարուցել են հասարակության վրդովմունքը և խուճապային տրամադրություններ:

ՊԵԿ-ի հայտարարությունից պարզվում է, որ խնձորի մաքսանենգության փաստ արձանագրված չէ և, որ անգամ 50 կգ խնձորի և այլ տեսակի պտուղ-բանջարեղենի ներկրումը իրականացվում է խիստ հսկողությամբ: Իր հերթին Սննդի անվտանգության պետական ծառայությունը հայտարարում է, որ ադրբեջանական խնձորի վաճառքն իրականացվել է մայրաքաղաքի և մարզերի տասնյակ (գուցե և հարյուրավոր) վաճառակետերում: Շեշտվում է, որ ծառայության սահմանային հսկիչ կետերով ադրբեջանական ծագման խնձոր չի ներկրվել:

Փաստորեն, պետական պատկան մարմինները իրենցից հեռացնելով պատասխանատվությունը, ոչ միայն ի ցույց են դնում իրենց անտեղյակությունն ու անճարությունը ներկրվող ապրանքների ծագման վերաբերյալ, այլև իրենց գործողություններով փաստացի հաստատում են սպառողի առողջության կամ կյանքի համար տվյալ ապրանքի վտանգավորությունը:

Դիմում ենք ՀՀ կառավարությանը՝ պահանջելով պատասխանել հետևյալ հարցադրումներին.

1. Ո՞վ և ի՞նչ ճանապարհով է ներկրել ադրբեջանական խնձորի նման մեծ խմբաքանակ:
2. Ո՞ր լաբորատորիաներում է ստուգվել այդ ապրանքի որակը: Եթե նման ստուգում չի եղել, ապա ու՞մ հրամանով և ինչու՞ է ոչնչացվում վաճառակետերում առկա խնձորը:
3. Ինչու՞ մեծաքանակ ներկրողին պատժելու փոխարեն, նյութական վնաս է հասցվում մանրածախ առևտրի կետերին և ո՞վ է փոխհատուցելու այդ վնասը:
4. Ինչու՞ մինչև օրս արգելված չէ թշնամի երկրի ցանկացած տեսակի ապրանքի ներկրումը: Անհնար է պատկերացնել, որ Ադրբեջանում թույլ տրվի վաճառել որևէ ապրանք՝ Product of Armenia մակնշմամբ:
5. Ինչու՞ նշված փաստով դեռևս հարուցված չէ քրեական գործ, որով կբացահայտվի երևույթի ամբողջական պատկերը և պատասխանատվության կենթարկվեն բոլոր մեղավորները, առավել ևս, որ հայտարարություններից բխում է, որ խնձորի խմբաքանակը չի հարկվել և, փաստացի, հայտնաբերվել է պատահաբար՝ շարքային սպառողի կողմից:
Մեր հարցադրումներից բխող մտահոգությունը պայմանավորված է պարզ ճշմարտությամբ: Եթե գործնական միջոցներ չձեռնարկվեն ազգային անվտանգությանը սպառնացող նման երևույթի իսպառ վերացման ուղղությամբ, ապա պետությունը և հասարակությունը խոցելի են դառնում ցանկացած հնարավոր դիվերսիայի հանդեպ:

Հայաստանի դեմոկրատական կուսակցության
Հանրապետական խորհուրդ
28.04.2017թ.

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Ապրիլ 2017
Երկ Երե Չոր Հնգ Ուրբ Շաբ Կիր
« Մար   Մայիս »
 12
3456789
10111213141516
17181920212223
24252627282930