Լոռու մարզպետ Արթուր Նալբանդյանն այսօր լրագրողների հետ հանդիպման ժամանակ անդրադառնալով Վանաձորի համայնքի ավագանու նիստերին, ասաց, որ խնդիրը լուծված է, նիստերն արդեն կայանում են. «Վանաձորի ավագանու թնջուկը շատ վաղուց լուծված է: Վանաձորի ավագանու նիստերը կայանում են, եւ որեւէ խնդիր չունենք: Նույնիսկ 9 հոգով կարելի է ավագանու նիստ գումարել եւ լեգիտիմ որոշումներ կայացնել: Օրենքը թույլ է տալիս»:
Դիտարկմանը, թե նիստերը գումարվում են առանց ընդդիմադիր ուժերի, մարզի ղեկավարն ասաց. «Եթե ընդդիմադիր հատվածն ասում է, որ իրենք մեծամասնություն են կազմում, եւ էս օրակարգային հարցերն իրենց սրտով չի թող գնան դեմ քվեարկեն: Ամենակարեւոր խնդիրներն են քննարկում, թող դեմ քվեարկեն, չանցնի»:
Արթուր Նալբանդյանի կարծիքով բոյկոտով ոչ մի հարց չի կարող լուծվել. «Այսօր Վանաձոր համայնքում շատ կարեւոր հարցեր են քննարկվում՝ Վանաձոր համայնքի բյուջե, 5-ամյա զարգացման ծրագիր: Մարդիկ ընտրել են էդ մարդկանց, որ գնան համայնքային խնդիրների մասնակիցը դառնան, բոյկոտով ի՞նչ է լուծվելու: Բոյկոտով լուծվում է ոչ մի բան, բացի միջանձնային մի քանի խնդիրներ»:
Տաթեւիկ ՂԱԶԱՐՅԱՆ
