Հայաստան դիտորդական առաքելության մեկնած եվրոպացի պատգամավորը զարմացած է, թե ինչու ձայների հաշվման ընթացքում էլեկտրականությունն անջատվեց:
Հայաստանում ապրիլի 2-ին կայացած խորհրդարանական ընտրություններին դիտորդական առաքելություն իրականացրած Եվրոպայի խորհրդի Խորհրդարանական վեհաժողովի (ԵԽԽՎ) պատվիրակներն առանձնապես տպավորված չեն Հայաստանում անցկացված ընտրություններով:
Ստրասբուրգում «Առավոտի» հետ զրույցում պատվիրակության անդամներից ոմանք խոսեցին իրենց արձանագրած խախտումների մասին:
Իտալացի պատվիրակ Ադել Գամբարոն նշեց, որ բազմաթիվ խախտումներ է արձանագրել, որոնց չի հանդիպել այլ երկրներում: Նա պատմեց. «Մի ընտրատեղամասում քվեատուփը լավ փակված չէր: Առաջին հայացքից թվում էր, թե փակված է, սակայն իրականում բաց էր: Միանգամից ահազանգեցինք այդ մասին, եւ ընտրատեղամասի ղեկավարի գլխավորությամբ տուփը փակվեց»:
Կարդացեք նաև
Տիկին Գամբարոն հայտնեց, որ Երեւանից բացի՝ եղել են նաեւ ՀՀ շրջաններում, զրուցել այնտեղ բնակվողների հետ. «Կար քաղաք, անունն այս պահին հստակ չեմ հիշում, որտեղ քաղաքապետը խառնվում էր ընտրական գործընթացներին: Սա անընդունելի է մեզ համար»:
Իտալացի պատվիրակի կարծիքով` Հայաստանում ընտրական գործընթացը խճճված է եղել. «Մինչեւ բուն քվեարկությունը մարդիկ մի շարք փուլեր էին անցնում: Այս մեթոդն իրեն չի արդարացնում, այն ժամեր է տեւում, նման բան ոչ մի երկրում չեմ տեսել: Ամեն ինչ այնքան խճճված էր, որ մինչեւ երեկոյան 23.00-ն արդեն հոգնել էինք»:
ԵԽԽՎ պատվիրակը նշեց, որ ձայներ հաշվելու փուլում էլեկտրականությունն անջատվել է շուրջ 15 րոպեով: Այնուհետեւ ծիծաղով հարցրեց. «Չգիտեմ` հաճա՞խ է Ձեզ մոտ նման բան լինում»:
Տիկին Գամբարոյի համար դրական էր այն, որ բավականին մեծ թվով կանայք էին մասնակցել քվեարկությանը. «Հասարակ քաղաքացիները բավականին լուրջ էին տրամադրված ընտրություններին: Բավականին շատ կանայք էին քվեարկում»:
Ադել Գամբարոյին հիշեցրինք, որ ԵԽԽՎ դիտորդական առաքելության պաշտոնական հայտարարության առաջին հատվածում ամրագրված էր, որ «Հայաստանում ընտրություններն անցկացվել են մարդու իրավունքների եւ հիմնարար ազատությունների պահպանմամբ»: Այնուհետեւ հարցրինք` ինչո՞ւ է ստացվել այնպես, որ զեկույցում տեղ գտած կարծիքն ու դիտորդների ներկայացրած իրականությունը չեն համընկնում: Տիկին Գամբարոն պատասխանեց, որ զեկույցում էլ են արձանագրված թերություններ:
Նորվեգացի պատվիրակ Ինգեբյորգ Գոդսկեսենը (լուսանկարում) մեզ հետ զրույցում պատմեց, որ հանդիպումներ են ունեցել հասարակ քաղաքացիների, լրագրողների եւ քաղաքացիական հասարակության ներկայացուցիչների հետ: Նա նշեց, որ հիմնականում դիտարկումներ են ունեցել նախընտրական փուլում. «Հիմնականում բոլոր քաղաքական ուժերը փորձում էին տպավորություն ստեղծել, որ ցանկանում են մի լավ բան անել Հայաստանի համար, լուծել Հայաստանում գոյություն ունեցող խնդիրները: Սակայն մեր զրույցները հասարակ քաղաքացիների հետ ցույց տվեցին, որ նրանք ոչ բոլոր դեպքերում էր, որ հավատում էին քաղաքական ուժերին»:
Տիկին Գոդսկեսենը նշեց նաեւ, որ ահազանգեր են ունեցել նաեւ ճնշումների վերաբերյալ. «Ճնշումներ են եղել քաղաքացիների, լրագրողների եւ քաղաքացիական հասարակության ներկայացուցիչների վրա»:
Փոխարենը տիկին Գոդսկեսենն ընդհանուր առմամբ լավ է տրամադրված ՀՀ բնակչության նկատմամբ: Նրա փոխանցմամբ` ի տարբերություն շատ այլ երկրների, հայերը բարյացակամ էին եւ հոժարակամ խոսում էին իրենց հետ կատարվածի մասին:
ՏԱԹԵՎ ՀԱՐՈՒԹՅՈՒՆՅԱՆ
Ստրասբուրգ-Երեւան
«Առավոտ»
28,04.2017
