Այս տարվա առաջին եռամսյակը լրատվամիջոցների աշխատանքում առանձնացել է խորհրդարանական ընտրությունների նախընտրական շրջանի լարվածությամբ. գրանցվել է լրագրողների հանդեպ ֆիզիկական բռնության 3 դեպք: Այս մասին այսօր «Բլից Ինֆո» մամուլի ակումբում հայտարարեց «Խոսքի ազատության պաշտպանության կոմիտեի» նախագահ Աշոտ Մելիքյանը: Նրա փոխանցմամբ՝ նույն շրջանում ավելացել է լրագրողների հանդեպ ճնշումների թիվը՝ 32 դեպք, որոնք հիմնականում կապված են «Իրազեկ քաղաքացիների միավորում» հ/կ-ի կողմից՝ ՀՀԿ-ական դպրոցի տնօրենների աղմկահարույց ձայնագրությունների հրապարակման հետ:
«Ակնհայտ է, որ իշխանությունները դատարան դիմելու հարցում ուղղորդել են դպրոցի տնօրեններին: Հաշվեհարդարի միտում կա»,-դառնալով փաստին, որ որոշ տնօրեններ դատի են տվել Դանիել Իոաննիսյանին, ասաց Մելիքյանը:
Նա առանձնացրեց նաեւ այն փաստը, որ նախընտրական շրջանում մի շարք թեկնածուներ աչքի են ընկել ոչ կոռեկտ կեցվածքով, երբ լրագրողները վերջիններիս սուր հարցեր են ուղղել:
«Չգիտես ինչու՝ նրանք համարում են, որ լրագրողներն իրենց չպետք է սուր հարցեր տան. վիրավորում են լրագրողներին, բորբոքվում: Մեդիադաշտի ներկայացուցիչների մեծ մասն աղջիկներ են: Թեկնածուները սկսել են նրանց «աղջիկ ջան»-ով հաճախ դիմել, վիրավորել: Դա միտում է դառնում»,-նկատեց Աշոտ Մելիքյանը:
Կարդացեք նաև
Այլ մանրամասները՝ տեսանյութում
Լուիզա ՍՈՒՔԻԱՍՅԱՆ
