Երեւանի քաղաքապետ Տարոն Մարգարյանը գտնում է, որ Երեւանի ավագանու ընտրություններում իր մրցակիցները՝ «Ելք» դաշինքը եւ «Երկիր Ծիրանին» նախընտրական ծրագիր չեն ներկայացրել, դրանք ընդամենը լոզունգներ են: Ըստ նրա, «Ելքը» շատ անիրատեսական խոստումներ է տվել: Մասնավորապես, կասկածի տակ է առնվում Նիկոլ Փաշինյանի՝ 5 տարում մետրոյի նոր կայարան բացելու խոստումը:
Այս առնչությամբ մեզ հետ զրույցում «Ելք» դաշինքի պատգամավոր Արամ Սարգսյանը պատասխանեց. «Այն ժամանակ, երբ որ Սերժ Սարգսյանը 2008-ին խոստանում էր Աջափնյակում մետրոյի երկու կայարան բացել, լավ կաներ Տարոն Մարգարյանն այդ ժամանակ ասեր, որ Սերժ Սարգսյանը անիրատեսական բաներ է առաջարկում, ժողովուրդ, դա հնարավոր չի: Ոչ իրատեսական բան չկա: Ցանկություն ու կամք ունենալ է պետք: Որեւէ մեկը չի ասում, որ մեկ տարում մետրոյի մեկ կայարան սարքենք: Անձամբ ես գտնում եմ, որ Երեւան քաղաքում տրանսպորտային խնդրում մենք էլեկտրական տրանսպորտին շատ լուրջ առավելություն ու տեղ պիտի տանք: Եվրոպաներում արդեն 10 տարուց ավելի է՝ օգտագործվում են մեկ գծային տրամվայները, որոնք մեկ գծի վրա են»:
Մեր դիտարկմանը՝ քանդեցին, հանեցին փողոցներից բոլոր գծերը, հիմա նորից պետք է քանդեն ու գծե՞ր տեղադրեն՝ Արամ Սարգսյանը պատասխանեց. «Քանդեցին-հանեցին, որովհետեւ ճանապարհները չէր բավարարում մեքենաների համար, իսկ մեկ գծանի տրամվայները իրենք գնում են ուղիղ մեջտեղով, ասֆալտապատ ճանապարհի վրա, տրամվայի երկու կողմերին ռետինե անիվներ են եւ երբ որ իրենք չկան, մեքենաներն այդ տարածքով հանգիստ շարժվում են ու որեւէ կերպ դա չի խանգարում: Այդ տրամվայները ամռանը հով են, ձմռանը շատ տաք են, անհամեմատ ավելի հաճելի է դրանով երթեւեկելը, քան տաքսիով: Այնպես որ, 21-րդ դարը տրանսպորտում նորարարություններ է բերում, որը թե՛ գնային, թե՛ հարմարավետության առումով նույնիսկ ավելի ձեռնտու է, քան մետրոն, մանավանդ Երեւանի նման քաղաքում կարելի է դա անել: Պետք է Երեւան քաղաքը շատ սիրել: Ինձ համար Երեւանը աշխարհի ամենալավ քաղաքն է, բայց այս բակերը, որ ման եմ գալիս, այս բակերում վիճակն ավելի վատ է, քան մեր Դավալու գյուղում»:
Ըստ Արամ Սարգսյանի, որ Երեւան քաղաքում ահռելի թերություններ կան, որ այդ թերությունները հենց Տարոն Մարգարյանն ինքն է ասում տրանսպորտի մասով, որը ամենահիմնականն է քաղաքի համար, դա փաստ է. «Քաղաքի համար մեկ արյան երակը, արյան շրջանառությունը տրանսպորտային միջոցն է: Եթե արյան երակները խոլեստերինով լի են, արյան շրջանառություն չկա, էդ քաղաքի ճնշումը բարձրանում է»:
Կարդացեք նաև
Մենք ճշտեցինք՝ հիմա Երեւանի ճնշումը բա՞րձր է, նա պատասխանեց. «Իհարկե, շատ բարձր է: Մարդիկ տրանսպորտից մտնում են տուն՝ ջղայնացած վրա են տալիս իրենց կանանց, երեխաներին, կանայք վրա են տալիս ամուսիններին: Ասել, որ այս ամեն ինչի մեղավորը Երեւանի քաղաքապետարան է՝ ինչ-որ տեղ այո: Այս հարցերը պետք է լուծվեն»:
Հռիփսիմե ՋԵԲԵՋՅԱՆ
